疫苖消息繼續炒，Moderna都有疫苗，94.5% effective，仲要唔使負70度運輸，完勝輝瑞，隔晚兩者股價此起彼落，唔知稍後會唔會見到大股東又趁好消息出貨……疫苗消息帶動美股做好，道指創收市新高，帶動港股今早做好，可惜喺A股腳軟下，港股未能高位企穩，盤中更一度倒跌。
恒指高開133點，開市後曾升148點，見26530點，創7月7日以來新高。喺A股唔多精神下，港股亦回軟，曾倒跌25點，見26355點半日低位。恒指中午報26410點，升28點；國企指數報10574點，微跌4點。恒科指跑輸，半日跌逾2%，報收7889點，八千大關得而復失。
又係資金喺新舊經濟股之間輪動，疫苗一有利好消息，資金又再流入傳統股，沽出新經濟股換馬，令相關股份受壓，而傳統股又威威。友邦(01299)升1.7%；滙控(00005)半日升0.6%；吉利(00175)揚3.2%；中石油(00857)飆6.6%，為升幅最大藍籌。不過對於石油股，阿Man一向對石油股有超強戒心，尤其係今次因為疫苗研發有進展，憧憬經濟迅速反彈甚至引發通脹重臨，油價會上升…….呢一切都只係樂觀預測，畢竟歐美國家呢一刻事實係疫情反彈，仲未知會否再度lock down，咁快炒到通脹推升油價，似乎樂觀得滯。
科技股反咗艇，京東(09618)交出一份似樣業績，但一樣要捱沽，皆因上季經營利潤跌12%，半日插水6.6%，其實都係業績前炒過籠，咁績後回吐好正常，更何況回吐極都仲係處於高位啫。騰訊(00700)同樣係業績後急抽一下無咗影，暫時炒住上落先，挨近600食糊，跌穿570分段入貨。美團(03690)將成藍籌新貴，但rebalancing要到12月4日，被動基金先係最後召集，呢段時間又係炒上落，300元附近分段買，唔好忘記上星期落到270呀！華為落實出售榮耀手機，由於售價唔算好，拖累低小米(01810)估值，小米未能重返高位，暫時喺22至24之間上落。阿里(09988)唔使多講，得罪阿爺點會有好日子過，半日跌0.6%算少，皆因上周五人哋激彈時，佢仲係打咗懵仔針咁款，講咗好多次呢期係跑輸，其雲業務再勁，暫時都難有運行。
航空股及航運股有資金追捧，呢兩個板塊都唔係阿Man杯茶，急升都當睇佢唔倒，阿Man等緊飛去旅行等到頸都長，各國重啟自由通關遙遙無期，炒住憧憬亦只能低吸，絕唔建議高追。
麥狄文
(徐狄怡‧證監會持牌人)
