美股上周五仍然偏軟，雖然道指尾市跌幅收窄，但一星期計仍錄得3月以嚟最大跌幅，而今日道指喺亞洲時段先跌後回升，日本股市又做好，港股高開反彈，恒指上周累計跌咗811點，今日彈返兩舊都好應該。
恒指高開167點後，升幅隨即擴大，早段一度升至276點，報24384半日高位，剛好彈至20日線(約24385)遇阻力回落，升幅縮水至125點，見24232點半日低位，其後升幅再度擴大至200點。恒指中午報24318，升210點；國指中午報收9868點，升108點；美國納指跌勢較顯著，今日港股嘅科技股個別發展，令恒科指半日跌6點，報收7527點。
美國總統大選明日舉行，但唔少人當正民調領先嘅拜登贏硬咁款，皆因市場普遍認為拜登入主白宮的話，有利亞洲股市發展，傳統股亦會再度抬頭，睇番今日啲傳統股有資金流入，大笨象(00005)半日反彈近2%；中移動(00941)亦升2.5%。至於內銀股今日都翻炒，主要係有大行認為內銀股已捱過最壞嘅情況，工行(01398)跟中行(03988)升逾2%，建行(00939)更升3.7%。但係平保(02318)持有嘅陸金所，上周五於美國首掛生不逢時，撞正納指大跌，陸金所一上市就潛水，拖累平保半日跌1.1%。而騰訊(00700)半日則無起跌，小米(01810)就跌咗1.1%。不過螞蟻集團(06688)上市在即，加上嚟緊雙十一購物節，阿里(09988)半日升0.3%；同樣具雙十一購物節概念嘅京東(09618)，半日亦升0.8%。
其實阿Man講咗好多次，對於傳統股反彈毫無興趣，喺金融服務業數碼化及科技化後，對傳統金融機構定必帶嚟衝擊，新經濟股係取代傳統股更值得持有嘅藍籌股，尤其係經過大笨象今年暫停派息一役後，投資者真係唔好再盲目地追求高息藍籌股。阿Man經常強調買股票投資，追求資金增值重要過收息，尤其係傳統股呢幾年股價表現弱到咁，貪息往往輸價，得不償失。
螞蟻集團未上市，保薦人中金(03908)先興奮，中金H股今早曾見18.98元，可惜18.5元樓上阻力唔細，H股相對中金A股升9%，繼續大落後。不過自從人民幣回勇，內地金融板塊包括券商股都好番，今日其他內地券商股，走勢相對中金更為耀眼，閒閒地升2%或以上。
藥股呢期唔精神，今日藥股普遍延續跌勢，石藥(01093)跟中生製藥(01177)分別跌3.1%及2.6%，係表現最不濟嘅成份股。反而阿Man長線睇好嘅兩隻甩B股信達生物(01801)跟百濟神州(06160)，半日分別反彈3.7%及1.4%，呢對甩B孖寶，係跌市嘅撈貨之選。汽車股今日全線做好，阿Man至愛嘅比亞迪(01211)再創新高，半日升6.3%，廣汽(02238)跟長汽(02333)分別升6.3%及5.1%，吉利(00175)更升逾一成，有資金追捧，但阿Man情有獨鍾比亞迪，其他汽車股都睇唔上眼，尤其係呢期咁多大行上調比亞迪目標價，最樂觀睇到200元過外，比亞迪高處未算高，絕對係港版Tesla 股份，貴一貴都有捧場客搶貨，只係高位搶貨一向唔係阿Man嘅特質，有貨底梗係咬住唔改，至於有心上車，都係等個價落番10日線穩陣。
麥狄文
(徐狄怡‧證監會持牌人)
