熱門:

2020年10月28日 即巿股評 港股直擊

【盤房來料】長線組合除ATMX之外記得加埋J

隔晚美股個別發展,道指跟標指仍未止跌,但納指則見反彈,重磅新經濟股做好。恒指今早低開13點,開市價24773已經係半日高位,其後跌幅擴大至201點,跌穿10日線(約24627)及100日線(約24751),但又守得到50日線(約24563),半日低位見24586點後反彈,跌幅收窄並收復10日線。恒指中午收報24727點,跌59點;國企指數報9968點,跌34點;恒科指逆市做好,報收7626點,半日升78點。

話咗金融股升勢只係一時,難以持久,今日就係金融股陀衰家拖低大市,大笨象(00005)尋日阿Man有提水,有貨股東唔好期望太高,短線35元阻力都未衝得過,更何況要重返暫停派息前嘅水平,分分鐘40元已行人止步。而平保(02318)業績後被大行調低目標價,半日跌2.6%,呢啲傳統股就係咁,過到初一,過唔到十五,升穿一個位,但又跨唔過下一個阻力。內銀股普遍下跌,唔好問阿Man點解睇唔起呢個板塊,有反彈,冇上升,無貨咪自己跳入火坑,洗濕咗個頭嘅就要趁下反彈要唔要趁機逃生。

螞蟻集團(06688)招股必定火熱,無論螞蟻上市後表現如何,都成為破全球集資額紀錄嘅新股,港交所(00388)做得成呢單生意,當然直接得益,股價半日升1.8%,不過未能如其他阿Man愛股創新高。騰訊(00700)高處未算高,今日再創新高見598元,呢個價仍然低過大部份券商目標價600元樓上,更遠低於最城睇得最牛嘅麥格理目標價815元,之前覺得騰訊好貴嘅缸邊友,見到麥格理個815目標價,唔知又會唔會覺得騰訊仲好抵買呢?

幾時都話ATMX要長線,除咗騰訊之外,阿里(09988)今日亦創新高,喺螞蟻啟動上市計劃之際,阿Man已呼籲喺260元水平加碼或買入阿里,肯定螞蟻上市前,阿里必定落鑊,唔覺唔覺阿里已升越300元水平,不過現價較券商平均目標價340元左右仍有超過一成水位,而咁啱全城睇得最牛又係麥格理,目標價391元,真係邊個夠佢牛。美團(03690)跟小米(01810)仍需努力,前者半日升4%,表現強勁,係小米剛被大摩魔笛追魂降評級,半日都彈近2%算唔錯。其實除咗ATMX,阿Man決定長線投資組合內加埋個J上去,大家唔好諗歪咗,J係代表京東(09618),集團已計劃分拆京東數科同京東健康上市,有分拆消息支持,股價料可大漲小回向上推進。

內需股都係阿Man呢期心水,最近喺其他專欄推介過華潤啤酒(00291),半日升2.4%,同類青啤(00168)半日亦升1.8%,呢對啤酒孖寶一向受機構投資者歡迎。內需股今日多得萬洲(00288)交出一份唔錯嘅業績,半日升一成係表現最好藍籌股,不過萬洲久唔久受乜乜物物豬瘟困擾,要揀內需股阿Man都係鍾情一對體品股龍頭安踏(02020)同李寧(02331)。

汽車股個別發展,近日強勢嘅比亞迪(01211)再創新高,半日升4.5%,強者愈強,愈升愈有,每當回調至10日線就要把握機會上車。至於另一強勢汽車股係長汽(02333),半日升2.1%。4S汽車股以阿Man曾推介嘅中升控股(00881)最厲害,半日破頂再升3%。其他汽車股捱沽,傳統汽車股非阿Man杯茶,要買一係揀新能源汽車龍頭比亞迪,一係揀銷售豪華汽車嘅4S汽車股。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads