侵侵一好返少少就搞搞震，一出院就心血來潮叫停新一輪刺激經濟方案，話民主黨唔係有心用筆錢嚟抗疫刺激經濟，只係想用公帑嚟為民主黨攞分，搞到升緊嘅美股急轉彎，由升轉跌，三大指數跌逾1%。不過到今早亞洲時段又改變主意，又係Twitter發文，指願意簽署包括派錢在內的一系列刺激措施，令港股避過一跌，更成功收復二萬四關兼收復20日線(約24040)。
恒指高開19點報23999，之後迅速轉跌75點，見半日低位23905，但侵侵一個Twitter令道指期貨止跌回升，帶領港股收復失地，恒指一度倒升206點，高見24187。其後恒指升幅減半，最終恒指半日報收24091，升111點；國指半日收報9568，漲31點；恒科指半日報收7431，升95點。
侵侵表示美國參眾兩院應立即批准針對個人嘅1200美元現金發放、針對航空公司嘅250億美元以支持就業，以及1350億美元用於針對小企業的薪資保護計劃等措施。重磅藍籌股大多做好，大笨象(00005)升1%，不過都係咁嘅款，短期內難以扭轉弱勢。至於騰訊(00700)跟友邦(01299)則各升0.8%。阿里(09988)半日升2.2%，喺萬眾期待嘅螞蟻集團上市之前，阿里落鑊炒作實屬正常，睇嚟短期有機會升破前頂。蘋果公司已公布於本月13日舉行iPhone12發布會，手設股乘機落鑊，舜宇(02382)成為升幅最大藍籌股，不過阿Man就對手設股興趣不大，尤其一對孖寶舜宇跟瑞聲(02018)上面囤積咗唔少蟹貨，見升追貨好易中伏。
話咗中資金融股無運行，內銀股幾乎全線下跌，內險股亦偏軟，內地券商今日跌幅更為顯著，板塊逆市下跌，個別內地券商股更跌逾4%。早兩日炒高嘅醫藥股，今日同樣炒唔起，普遍回吐，但阿Man對生化藥股後市仍睇高一線。反而阿Man唔睇好嘅晶片股繼續反彈，不過中資科技股，尤其係晶片股一直係美國打擊嘅對象，唔知幾時美國又向相關企業出招，呢啲中美關係風眼股都係避之則吉。
麥狄文
(徐狄怡‧證監會持牌人)
