隔晚美股表現唔錯，當冚世界講到美股就嚟股災，又乜又物，世界末日咁款嘅時候，美股梗係死唔去，三大指數本周開市升逾1%，反映三大指數條50日線係有番咁上下支持。除咗有企業併購消息之外，肺炎疫苗再有進展，科技股跌定後回升，支持美股做好。港股承接噚日反彈之勢，今日繼續向好，恒指成功收復10日(24672點)及100日(24674點)滙聚區。
恒指低開18點報24621點，已見半日低位，之後內地公布中國8月份工業增加值、零售數據及固定資產投資表現均勝預期，大市升幅擴大。恒指最多升186點，見24826點半日高位。半日恒指報收24759點，半日升119點；國企指數報9848點，升42點；科技指數升46點，中午報收7364點。半日成交706億港元，個市精神番啲，缸邊友願意入市。
睇番幾隻重磅藍籌股，見到大笨象(00005)跌至32元超過11年低位，曾經係散戶寵兒嘅大笨象，如今淪落至此，如果仲持貨嘅股東真係有啲心傷。友邦(01299)跟平保(02318)半日升逾1%，建行(00939)跟工行(01398)微升，講真力水有限，阿Man睇唔起啲舊經濟股係有理由嘅。創科實業(00696)創新高，半日升2.6%。政府將公布第三輪抗疫基金，過去周末九倉置業(01997)旗下嘅海港城人山人海，未知第三輪抗疫基金會否再有刺激消費措施，但九倉置業先炒上，半日升43.5%係升幅最大藍籌股。小米(01810)遭始創人兼副董事長林斌減持，不過配股價折讓唔算多，而林斌亦承諾五年唔再減持手持餘下股份，雖然股價半日跌3.8%，但仍守配股價，不妨喺22.5趁低吸納。
國家統計局公布，今年首8個月，商品房銷售額9.69萬億元人民幣，按年增長1.6%，扭轉首7個月的2.1%跌幅。加上人民幣呢期回勇，內房股有資金追捧，當中以附屬公司恒大汽車(00708)批股嘅恒大(03333)升8.5%表現最勁，只係阿Man對恒大系一向有戒心，尤其恒大內地樓盤全線七折放售，可見負債最高嘅內房股，財務壓力一直未有退減。
恒大汽車折讓19.96%、以先舊後新配售1.77億股，引入騰訊、紅杉資本、雲鋒基金及滴滴出行等多個投資者，呢批股東可以話粒粒皆星，但偏偏股價未見上升，半日仲要跌8.1%，阿Man自問唔敢玩恒大系股份，閣下有心有力要參與當然唔阻止，但恒大系出咗名波動，上咗車一見勢色唔對路，記住要識得跳車逃生。新能源汽車股阿Man一向睇好龍頭比亞迪(01211)，今日勁升創新高，半日升近13%，睇嚟好快變紅底股。有貨分段食糊梗無問題，不過咁強勢嘅股，點都可以留少少底。
麥狄文
(徐狄怡‧證監會持牌人)
