噚日休息咗一日，啲新經濟股同科技股跌到一仆一碌，大覺瞓足一日唔睇市，唔使眼寃。美股放完一日假返嚟仍未止跌，三大指數繼續插水，納指更跌逾4%，短短三個交易日跌逾一成，陷入技術性調整。至於港股噚日都冇乜彈力，今日繼續捱沽，尤其科技股早段跌勢都幾兇殘，恒生科技指數一度失守7000大關。
恒指今早低低開328點，跌幅曾收窄至175點，見24448點半日高位，可惜彈少少又見沽盤湧現，跌幅再度擴大至410點，低見24213點，創8月7日後低位。其後大市開始喘穩，跌幅收窄至300點內，中午恒指報收24385點，跌238點；國指跌104點，報收9725點；恒科指則跌104點，報7019點，七千大關失而復得。
噚日啲中資金融股係威係勢，今日咪又係要回吐，工行(01398)跟建行(00939)回吐逾1%，平保(02318)險守80元跌少過1%，國壽(02628)則跌逾1%。友邦(01299)跟大笨象(00005)唔見好得去邊，半日分別跌1%及2%，尤其大笨象一直低位徘徊，小股東真係死咗條心，咪諗住今年之內上得番40元樓上。港交所(00388)話就話跌到去條50日線，好似調整咗好多咁款。但由高位396.8元計，回吐幅度都未夠一成，相對ATMX另外四大不可或缺嘅鎮倉股，港交所表現已算硬淨。
睇番ATMX今日低位較歷史高位回調超過一成，除咗小米(01810)之外，其餘三大巨頭已失守多條移動平均線，睇落已跌至一個甚為吸引嘅水平。不過呢兩日北水顯住留出相關股份，尤其係美團沽壓較嚴重，當然跟之前累積升幅較大有關。咁幾時可以撈ATMX，阿Man建議睇多一兩日，先觀察，後買貨，寧願買貴都咪買錯。若然閣下自問係心急人，唔想再等就要分注入貨，長線睇好都唔一定要一炮過掃貨，畢竟美股科技板塊，短線仍有下調壓力；其他科技股跌勢更顯著，閒閒地跌2%以上，之前熱炒嘅香港電視(01137)半日更跌近一成，暫時咪多手接飛刀。
除咗科技股之外，物管股近日明顯走弱，係較科技股更早展開跌勢嘅熱炒股，阿Man寧願吼科技股都唔孔物管股，皆因美國科技股一反彈，港股呢邊嘅科技股肯定跟住彈，物管股跟唔跟反彈真係好難講。
多個國家追要搞旅遊氣泡，旅遊業相關股份近日有資金追捧，不過阿Man唔知點解見到旅遊氣泡呢個詞語，就聯想到泡沫兩個字，泡沫呢家嘢聽落梗係負面，阿Man跟唔少怕死嘅朋友都不約而同表示，即使有旅遊氣泡，但喺無疫苗嘅情況下，真係唔多敢搭飛機四圍去。當然實際上有幾多旅遊達人，又或愛玩唔愛命嘅敢死隊喺旅遊氣泡落實後即動身飛，跟航空股炒唔炒高又確係兩回事，不過呢個板塊高追必有伏，要買都係留彈藥撈科技股。反正螞蟻集團上市之前，阿Man有信心科技股肯定再落鑊翻炒，為螞蟻打氣造勢。
麥狄文
(徐狄怡‧證監會持牌人)
