美股隔晚繼續爆升,除咗科技股持續強勢外,肺炎病毒治療有新進展,美國批准以康復者嘅血漿對患者進行治療,市場憧憬疫情可以受控,三大指數連升三日,納指跟標指再創收市新高。不過港股連升兩日後,隔晚喺ADR及夜期均見回吐,今早高開低走,半場跌逾百點。恒指高開35點報25586,最多升69點,見25621點半日高位,升至超過一個月高位,不過250日線(25653)前又見阻力,加上A股腳軟拖累下,恒指曾倒跌188點,低見25363點,中午報收25416點,跌135點;國企指數跌76點,報10259;科技指數則跌133點,中午報收7196點。
美股科技股牛氣沖天,但港股呢邊科技股今日唔係幾精神,騰訊(00700)雖以佳績示人,但市場之前擔心旗下微信海外版WeChat被封殺,完全升唔起,直至噚日有消息指美國允許美企喺中國市場繼續使用微信,騰訊噚日發力,可惜升勢未能持續,半日回吐1.5%,幸而仲守住噚日535元低位之上。美團(03690)遠超預期嘅業績,支持股價噚日再創新高,但今日同樣要回吐,半日跌2.7%。小米(01810)係ATMX之中唯一未派成績表,業績前撞正科技股回吐,小米半日亦跌2.6%,半日失守18元。
阿里巴巴(09988)之前一直落後,但派完成績表,加上美國表示暫時唔搞佢,阿里鬆咗口氣,股價噚日總突破之前幾個頂部,今日升勢持續,盤中更創274.4元上市新高。有消息指有投資者沽出美國上市阿里股份,改為買入港股上市嘅阿里,令阿里呢兩日表現大勇。集團已落實旗下螞蟻集團今年內於滬港兩地同步上市計劃,資金亦樂意追落後。同具分拆業務計劃嘅京東(09618),將分拆京東健康上市,此外仲有京東金融等業務可以分拆,市場直頭當京東係阿里翻版。
藍籌股個別發展,大笨象(00005)又玩另類,人跌佢升,今日逆市升1.8%,竟然係表現最好嘅藍籌。手機設備股近日跌到一仆一碌,一對手設股孖寶瑞聲(02018)同舜宇(02382)喺業績公布後表現尤其差,雙雙被大行唱淡,股價走勢一瀉如注,暫時兩股都仲未到個底,呢個時候咪貪平去撈貨,呢啲位接刀好易整損手。其他手設股同樣疲弱,估計喺華為被封殺事件繼續發酵之下,呢個板塊暫時避之則吉。
今日表現最標青一定係航空股,市場憧憬疫情受控,更有不多國家及地區開始研究旅遊氣泡計劃,逐步恢復跨境旅遊。美國航空股近日已熱炒,今日航空相關股份全部逆市上升。不過講真一句,所謂旅遊氣泡不過係炒作藉口,即使疫情緩和,但預防疫苖未普及嘅情況下,又有幾多人真係可以為咗外遊去玩而夠膽搭飛機搵命博,至少阿Man怕死唔會博。對於航空股嘅炒作,阿Man選擇作壁上觀,亦無勇氣入場炒埋一份。
麥狄文
(徐狄怡‧證監會持牌人)