美股隔晚個別發展，股神畢非德沽金融股，更將手上高盛股份沽清，拖累道指下跌85點，但標指喺大部份成份股公布優於預期業績支持下，升至接近紀錄收市高位，差幾點再創新高。納指則再創收市新高，升逾百點，帶動今日港股呢邊嘅大型科網股做好。恒指高開123點報25470，經已係半日高位，隨即掉頭向下。一度倒跌79點，之後掉頭向下，曾倒跌79點報25267。恒指中午報收25385，升38點；國指則升54點，報收10440點；恒科指則報收7127點，升52點。
美國再推新措施封殺華為，由其5G到手機業務進行全面封殺，但就表示暫時無意「搞」阿里巴巴(09988)，今日阿里總算鬆一口氣，股價亦進帳2.4%，但暫時未能重上250元水平。不過侵侵嘅嘢唔知幾時跳掣，始終內地科網企業都係美國要針對嘅對象，缸邊友有戒心亦正常。好似華為畀美國追殺超過一年，美國商務部對華為使用美國技術施加新限制，手機設備股跌到一仆一碌，華為供應商沽壓嚴重，剛公布完業績後股價即插水，中午跌近一成，藍籌之中跑包尾。瑞聲(02018)下周一派成績表，半日跌4%；比亞迪電子(00285)亦跌近一成，其他手設股跌幅普遍超過2%。
雖然手設股跌到走晒樣，但幾部中資電話又回勇，兩個板塊此起彼落，相映成趣。華為喺歐美國家發展5G業務受阻，但內地發展5G如火如荼，聯通(00762)董事長王曉初表示，正加快與中國電信(00728)共建共享，聯通日前勁升後回調，今日回勇勁升11.1%，藍籌之中升幅最大。中電信中午派成績表，表現平平，上半場升逾5%後，下半場升幅可能要縮水，至於中移動(00941)半日升逾2%。
金價升越2000美元大關創新高後回吐，一度跌穿1900美元水平後反彈，又再度逼近2000美元，由於主流機構投資者均睇好金價後市走勢，金礦股再度成為資金追捧對象。至於邊隻金礦股最睇好，阿Man一向首選含金量最高嘅山東黃金(01787)，而黃金水ETF則由過往最具人氣嘅SPDR金ETF(02840)轉去玩兩倍槓桿嘅南方黃金(07299)，相對敏感度較高，更貼近金價走勢。
信達生物現價值得收集
噚日港交所(00388)專登強調已被納入恒生綜合指數成份股嘅股份，並唔等於即搭上港股通快車，主要係未有收入及盈利嘅生物科技公司，俗稱B仔股，暫未納入港股通選股範圍之內，而阿Man噚日亦有提醒過大家，千祈唔好表錯情。不過信達生物(01801)呢隻過氣B仔，其實喺6月份嘅時候已成功甩B，今次亦被納入恒綜指，即已獲得港股通入場卷，股價呢兩日下跌，唔知係咪缸邊友誤會佢仍然係B仔股。其實唔少大行都睇好信達未來收入增長，股價喺7月高位60元水平回到落嚟50元樓下，呢啲位已值得收集，下面跌穿45元止蝕，上面睇番60元，三個幾銀錢博十幾蚊回報，有數圍自然有得諗。
麥狄文
(徐狄怡‧證監會持牌人)
