歐美疫情以有放緩跡象，美國已有個別州份計劃重啟經濟，市場風險胃納上升，隔晚美股做好，三大指數升逾1%，港股今早高開後表現反覆，但半日最終仍錄得升幅。恒指高開120點，其後掉頭向下，一度跌103點，見24176點半日低位，但仍守10日線。其後A股做好，港股亦回復升勢，最多升207點，見半日高位24488點，但50日線(24663點)阻力仍大，中午收幅收窄。恒指中午報收24466點，升186點；國指升76點，報收9952點。
大笨象(00005)中午派季度成績表，稅前盈利跌48%，信貸損失更增逾4倍，不過市場早有心理準備大笨象業績沒有最差，只有更差，股價半日反日隨大市上升，半日升1.8%，重上40元。其他重磅股普遍做好，不過Adidas首季經營溢利大跌，申洲(02313)亦被拖累跌1.2%，係表現最差藍籌胮股。
抖氣咗兩三日嘅晶片股，今日表現醒神，主要係美國對中國出口實施新限制，以阻止半導體生產設備及其他技術流向中國軍方，如此一來，內地用家只有依賴內地晶片商。市場亦憧憬內地將有政策扶持內地晶片商發展自家技術，晶片股今日做好，當然最熱炒係中芯(00981)。早幾日見北水持出沽中芯，可能跟假期前鎖定利潤有關，今日北水開始放假，少咗北水沽盤，即見回勇。暫時股價要企穩10日線(14.73)之上，中芯先有機會進一步向上，而阻力係前高位約15.5至15.6水平。
另一個表現較突出板塊係內地券商股，深創板改革兼試註冊制，券商股有資金追捧。內地券商將陸續公布業績，相關股份亦落鑊。不過券商股都唔係易炒，尤其大部份券商股仍處接近年內低位，無錯係再下跌空間有限，問題係上面阻力重重，個個位都有蟹貨，要完全扭轉弱勢仍有難度。
值得留意係呢幾日正正係少咗北水，成交縮水，要舞高弄低更容易，小心呢兩日挾高結算同月結後，大市喺缺乏利好消息下，難以再向上，尤其恒指要突破50日線唔容易，25000點阻力更大。
麥狄文
(徐狄怡‧證監會持牌人)
