熱門:

2020年3月24日 即巿股評 港股直擊

【盤房來料】全球央行狂放水 金屬價格走強

美國聯儲局繼續開水喉,表示推無上限QE,呢鋪終於令到侵侵滿意,口痕友話可能侵侵不斷疲勞轟炸鮑爺,為咗塞住佢把口,就接二連三放水,今次一鑊過不設上限買債,免得侵侵又煩鬼住晒。不過隔晚美股都無因為聯儲局嘅大刀闊斧放水而大升,反而三大指數再跌,要去到今早喺亞洲時段先有得反彈,暫時道指跟標指期貨齊齊升逾3%。

除咗聯儲局放水,人參國亦宣布推出100萬億韓圜救市措施,並設立規模20萬億韓圜債券穩定基金,及10.7萬億韓圜股票支持基金。日本央行亦跟聯儲局達成893億美元貨幣互換便利協議。另一方面,菲律賓央行下調銀行準備金率200個基點,並於3月30日生效。各大央行齊齊出手,亞太區股市今早就顯著反彈,港股噚日跌逾千點後,今日終於識反彈。

恒指高開801點,早段升幅曾收窄至687點,見過半日低位22383點,其後升幅再度拉闊,最多升978點,見半日高位22674點,其後回順。恒指中午報收22468點,升772點;國指報收9097點,升346點。

繼煤氣(00003)派送由10送1紅股縮水至20送1紅股後,恒地(00012)索性暫停派送,噚日股價跌逾5%後,今日再跌1.8%,成為唯一逆市下跌藍籌股。其他藍籌股全日上升,至勁係已派成績表嘅聯通(00762),去年賺一成一兼增加派息,半日升逾一成,藍籌之中表現冧巴溫。

騰訊(00700)半日升逾3%,話咗新經濟股彈起上嚟都快啲,暫時股價只要守得住350元,股價仍有條件向上挑戰370至375元。至於大笨象(00005)半日反彈1.2%,不過之前累計跌咗咁多,呢吓反彈完全無力。雖然呢期港股表現疲弱,但成交仍然暢旺,港交所(00388)係就係少咗好多IPO生意,但日均成交維持倒,港交所未算太差,股價半日反彈4.7%,留意反彈阻力約227元,支持位喺210元應該守得住。

聯儲局宣布啟動無限QE,金價反彈逾5%,重上1567美元,更成為史上最大升幅。更有報道指黃金產量陷入困境,及採礦業放緩,預期金價將進一步上升,短期更有機會升至1700美元,甚至暴升創正史新高。其實阿Man一直睇好今年金價表現,只要金價一直守住1450美元,金價仍未轉弱。

講番個市暫時短期見底睇法不變,不過反彈只能一步一步向上推進,短期市況波動情況未改,估計喺下周期指結算前港股大致喺21500至23000點之間上落,當然目前大市已重上22000,只要企穩22500,下一目標當然係22800至23000。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads