噚日傳聞中東基金喺香港時間午後瘋狂掟貨,因為要應付大量贖回,乜嘢資產都拋售,油股金無一倖免,除咗美元之外,所以資產價格急瀉。噚日美股喺亞洲時段已跌停,去到正常交易時間,再一次熔斷停市,美股史上五次熔斷停市,四次發生喺呢半個月內,連股神巴菲特都話活咗89年未見過呢啲場面,我等有幸經歷如此大時代,都算今次無憾。
隔晚道指一度跌穿19000點,港股喺夜期時段亦曾跌至21500水平,以為呢個低位今日都會守住,豈料今早港股又因為美股指數期貨掉頭向下而一瀉如注。早段恒指低開70點後,曾因美期上升而倒升88點,當時係因為市場對歐央行表示QE已有所反應。可惜美期未幾而掉頭向下,港股沽盤再現,恒指最多跌1152點,至2016年12月低位,見過半日低位21139點,創2016年7月12日以嚟新低。其後跌幅一度收窄至少於600點,但可惜反彈乏力,中午仍要跌近千點。恒指中午報收21344點,跌946點;國指則報收8366點,跌434點。半日成交額已逾千億,市場要錢唔要貨嘅行為好明顯。
英鎊滙價跌至35年新低,近年喺米字旗國押重注投資嘅長和系,今早全系被質爆,長和(00001)跟長實(01113)收市先派成績表,但投資者已等唔切要沽定貨先。長建(01038)已派成績表,半日股價被質低11%,係表現最差藍籌股,而長和跟長實則分別跌9.1%及8.9%,連電能實業(00006)呢隻公用股都唔放過,半日跌逾6%。
騰訊(00700)派成績表表現不過不失,但盈利增長屬預期下限,本以為開市都冇運行,豈料早段仍曾錄得3%升幅,博業績嘅呢兩日買貨都仲有機會跳車逃生。不過大市沽壓沉重,騰訊終不敵大市沽壓,中午仍要跌近1%,暫時320元支持位仍守得住,長線嚟講騰訊呢啲位再沽落去都無乜意思。
至於阿里巴巴(09988)就慘情啲,由於係第二上市關係,第一身喺美國市場仆直,咁港股呢邊都要跟番估值下調,半日再創上市新低167.6元,中午報收168.8元,半日跌2.4%,招股價當然失守。其他新經濟股同樣不敵大市跌勢,美團(03690)跟小米(01810)齊齊過堂。
目前所有資產價格都急瀉,連避險工具黃金都要插水,失守1500美元,日圓匯價亦走軟,只有美匯指數上到100,人仔當然七算不保,人民幣敏感股航空股本來已因為疫情令業務陷入癱瘓狀態,加埋人仔疲弱,雙重夾擊下,航空股暫時有得震,冇得瞓,呢個板塊暫時唔好博反彈。
油價食咗瀉藥唔識停,隔晚紐油期貨再大跌兩成半,插水去到20.06美元一桶,阿Man早兩日曾於直播節目內表示,千祈咪睇石油股息率高而有錯覺可以撈嚟收息,僅記息即是凶,收息未夠輸價,得不償失。
暫時半日港股似喺21000守得住,不過21000其實唔係乜嘢支持位,或者去到20000點心理關口會有較大支持,加上20000點嘅港股相等於約1倍PB,1倍PB買股係吸引,只可惜暫時市場已進入非理性恐慌拋售階段,再吸引嘅價亦未必吸引倒已流出嘅資金重返市場。
麥狄文
(徐狄怡‧證監會持牌人)