噚日朝早揀定隻恒指牛(57457)出嚟,揀嘅時候同當時恒指有逾600點差距,不過以嗰時市況仲未適合落場,唯有就比啲耐性去等啦,不過好彩都唔使等好耐,講緊只係等到11點30分至上半場完前結為止,恒指5分鐘圖SlowSTC(14,3)落到超賣水平,呢個時候可以趁機將(57457)送落場,按當時(57457)高低位做過$0.063/$0.056,平均買入價就係$0.0595。
如果選擇Day trade嘅話,其實喺下半場恒指開市後至3點半前都有幾個唔同嘅收割時間,分別係2點15分至2點25分、2點40分至2點50分同埋3分15分至3點25分。其實就算唔按呢三段時間走貨,講緊係由第一段時間開始嘅2點15分至最後一段時間嘅披,即3點25分計,(57457)期間高低位$0.074/$0.067,平均賣出價就係$0.0705,一來一回,day trade平均賺幅 就有18.5%。
若然朝早嗰轉追唔到隻(57457)嘅話,其實見到尾市15分鐘恒指5分鐘圖無啦啦向下大插,呢個時間你都可以選擇入市,不過就好肯定係過夜,所以注碼上都要作出少少控制。至今朝開市可能都仲未興奮,因為講緊恒指都只係升145點;但到依家10點19分,恒指升275點,做緊26939點,熊證頭兩層(26700至26799點,同26800至26899點),呢度有相當於920張期指,而變相依家最貼價嘅就係26900至2699點,重貨區嚟架,有相當於1016張期指,但按依家10點25分,恒指最高做過26950點計,呢過千張期指睇怕遲早會被殺晒。
如果按恒指牛熊證街貨圖嚟計嘅話,再向上走嘅機會好高,事關恒指現價都已經企喺近熊證街貨區嗰邊,而下方牛證最貼價講緊係26100至26199點,呢度有相當於200張期指,貨唔多都唔緊要,但仲要遠嗰吓先至麻煩。
「咁咪可以再追恒指牛或者Call囉?」唔好住,睇埋恒指日線圖先啦,今日恒指再彈多200幾接近300 ,粒燭已經彈咗上去保歷加通道頂(26904點),依家仲keep住喺條頂上面,同步見下方SlowSTC(14,3)%K線同%D線都見「9」字頭,即上到嚴重超買水平,即係話暫時睇恒指已經呈超買嘅跡象。
咁當然啦,SlowSTC(14,3)係一組比較短線同敏感度高嘅指標,佢絕對可以超買再超買再超買都仲得,細看保歷加通道口其實由此前嘅收窄逐步拓闊中,即開始有多少少嘅空間比大市去行;要再Call上去唔係唔得,小心嘅係頭頂條100天線(27047點)先囉。
貼價牛槓桿係高,但啲街貨同樣都係咁高,為免證價受到街貨影響,寧願揀遠少少嘅證,例如恒指牛(57723), 收回價25992點,同現有逾900點差距,28倍槓桿算係OK高,但勝在街貨只有1.19%。見恒指5分鐘圖依家喺嚴重超買位見有少少回落嘅跡象,再追牛嘅要等陣。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:gladyshan@gmail.com;FB:輪證贏家