依家9點41分,啱啱返到公司坐底斟好杯茶,成條team暫時就得我一個,除咗電視機得嗰2度嘅聲同打字聲之外,真係靜過太空。
睇返恒指,今朝似乎想承接上個星期嘅升勢,恒指今早彈升212點,開市報26520點,市都未正式開市啪死咗上方熊證最貼價嘅26400至26499點,呢度有相當於1125張期指,貼價之餘仲係最重貨嘅部分,變相依家可以直接用26500至26599點呢度作為最貼價熊證,而呢層有相當於530張期指。
日線圖上見恒指已重返保歷加上升通道裏面,而上個星期五(10月11日)三條平均線都收復咗都的確為悶咁好耐嘅大市帶嚟少少刺激,再睇返下方嘅技術指標都係發出向好訊號;只係依家9點58分呈「T星」啫。
Well,反正都開咗恒指牛熊證街貨圖,就睇埋落去先。下方牛證頭四層今日見嘅全數都係新增,最貼價就係25900至25999點,有相當於212張期指,同現價(10點10分mark底嘅26590點)相差690點先可以食得晒;再者,唔mark個現價都唔驚覺恒指高位已經做過26602點,換言之頭先睇嘅26500至26599點嗰530張期指都死埋,依家要用26600至26699點作為最貼價牛證區啦,而呢度有相當於424張期指。
就咁睇呢424張期指確實係無乜睇頭,但承如上個星期都有投資者講「趁個市向上打上去嘅時候,吼位入熊博掉頭回落」,呢個諗法同策略無問題,但就要視乎上方熊證嘅街貨有幾多同有幾近,如果多又近嘅話,咁其實都無誘因令到個市會無啦啦向下走一條又遠又無肉食嘅路;換言之,似乎短線嚟講用牛證博大市繼續向上殺近熊似乎比較着數。
開牛熊證search engine時見到今日最貼價牛證嘅收回價上到26110點,呢度同現價(10點18分mark底嘅26562點)計,兩者相差逾450點,day trad嚟講呢個range嘅牛證都真係不二之選,可惜嘅係依家見到恒指5分鐘圖SlowSTC(14,3)上咗去嚴重超買水平,依家先啱啱見佢回落,呢個位入隻咁貼價嘅牛證確實係唔OK,等返條SlowSTC(14,3)落返去超賣水平,再睇返到時隻恒指牛(57347)同恒指現價實際點數差幾多,(57347)收回價26110點,全場最貼價兼最高槓桿,真係day trade好啦,同埋如果到恒指5分圖條SlowSTC(14,3)回返落去嘅時候,(57347)有面臨被收回嘅危險嘅話,咁就要考慮遠少少收回價,例如恒指牛(57414),收回價25938點,同現價有近600點差距,槓桿比率約39倍都唔輸蝕架。
今日10月14日,每年呢個日子都要同一位喺大學時代至今、每逢有難求救都會第一時間伸出緩手、我唔講都知我想做乜嘅同學+老友阿Milk講聲生日快樂!今年我應該係第18次同你講呢句說話啦,點呀,由體育轉嚟做財經,習慣未呀?。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:gladyshan@gmail.com;FB:輪證贏家