港股走勢反覆,隔晚美股休市,但道指期貨就腳軟,恒指則低開高走,不過半日仍然有啲腳軟,反映市場入市意欲極度疲弱。恒指低開80點後,開市一度跌128點,見半日低位25498點,其後拗腰再上,曾倒升109點,見過25736點半日高位。可惜喺缺乏買盤承接下,走勢再度回軟,半日恒指跌24點,報收25601點;國指則跌60點,報收10043點。
重磅藍籌股個別發展,騰訊(00700)繼續跑贏大市,半日升0.2%,報收331.8元,不過睇真啲,騰訊幅圖又唔係好靚仔,家下股價仲畀條250日線壓住,而335元似乎已成為阻力。舜宇(02382)重返紅底股後,走勢一枝獨秀,今日再升任,成為半日表現最佳藍籌。至於近日捲入政治事件嘅地鐵(00066),連日受壓後終於喺250日線見有些少支持,半日反彈1.6%。
陀地地產股被狂質幾日後,今日終於有得抖吓氣,不過睇真啲反彈力度弱過藥煲。細魔剛剛幫手踩多腳,噚日有報告唱淡陀地地產股,指地產股雖然已累積跌近兩成,但仍未反映所有不明朗因素,包括中美貿易戰及香港政治事件,已嚴重拖累香港經濟。細魔講到明最熊嘅情況下,香港樓價可跌三成,而商舖租金可能亦要下跌30%,即係話未有貨咪多手去撈,有貨都好趁反彈逃生。
至於汽車股,阿Man講咗N咁多次,千祈唔好畀一時三刻嘅反彈引誘到,再多國策支持都好,面對住貿易戰過後開放市場嘅龐大競爭,又或者係貿易戰期間嘅關稅威脅,內地汽車製造商肯定唔會有運行。今日廣汽(02238)更加喺分析員會議後被個別券商調低目標價,半日股價跌4.7%。其他內地汽車股跌幅由1.3%至超過3%。
而另一隻今日彈半成嘅小米(01810),同樣係唔可以被其誘惑,公司公布董事會獲授權最多可斥資120億元回購股份,聽落好似好好聽,千祈咪唔記得公司管理層仲有幾多平到跌渣嘅股權喺手,加上公司耐唔耐就可以「慷慨」派送畀員工,基本上咁多平貨周街遊,小米短線反彈都好,長線唔會有運行。
麥狄文
(徐狄怡‧證監會持牌人)