今朝早恒指開市裂口下跌,開市跌188點,28406點。依家10點2分,恒指暫時最低做過28338點,最多跌256點,喺牛熊證街貨圖上,第一層28400至28499點嘅牛證率先死亡,而呢度有相當於61張期指。
就咁睇個點數係咪以為恒指已經爆咗單邊?開返個日線圖睇,其實恒指仍然處於「三角形」裡面,只不過由噚日挨近「三角形」頂,變成今日走近「三角形」底,同步睇返下方DMI嘅ADX仍然向下,呢啲調整味愈嚟愈重,但同步地有埋尾嘅感覺。
睇返隻恒指牛(69334),今朝開市跌到落得返$0.04X呢啲位確實嚇死人,不過恒指落去完去後到依家(10點28分)恒指跌幅有所收窄,而(69334)亦都跌少咗,至依家報$0.05,比起之前嘅平均買入價$0.0605輸緊17.36%,如果注碼本身唔大而呢個蝕幅仲頂得住,咁就真係可以以「三角形」底(大約281XX點)作為止蝕位;如果頂唔順嘅,咁你應該要進行止蝕。
開埋恒指牛熊證街貨圖,上方熊證28600至28699點有11張期指,全數都係新貨,即係話呢一層係新增嘅層數,而於下方牛證最貼價就係28300至28399點,呢度有相當於618張期指,係最多新增嘅一層,而呢兩層街貨嘅中間數就係(28600+28399)/2=28499.5點。依家10點34分,恒指做緊28465點,跌128點(又縮咁啲),恒指同噚日一樣,開市chok咗一下之後就企返係牛熊街貨中間位,睇嚟(69334)同個市真係要嚟一場長期戰。加油!
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家