噚日揀咗隻恒指Call(27447)出嚟，平均買入價係$0.0855，但由於恒指食咗唔知幾多啖豬油，打橫行個情況同令時空停頓幾乎無分別咁滯，都真係要望真啲隻錶上面個時間先知道係幾多點咋。基於收咗市都唔覺，(27447)就過咗夜。
今朝起身睇新聞，話噚晚美股造好，但又話ADR個別發展，再加上見電視機右下角報日經粒數係紅色嘅，心知(27447)今朝點都要捱一捱。
今朝恒指一開跌94點，報28781點。依家9點57分，恒指最低暫時做過28721點。開恒指牛熊證街貨圖睇，見下方新增28500至28599點，但同上方熊證第一層28900至28999點比，單以暫時低位度，都係近熊證比較多；再者，熊證喺29000至29099點呢度有相當於910張期指，喺熊證區嚟講已經係屬於重貨層，以現價(10點14分)28835點計，恒指同上方熊證又再近多一步。
即使日線圖上恒揩噚日出現「十字星」，今日如「十字星」所願由升轉跌，但見10天線(28500點)有準備抽升條100天條(28604點)之嫌，當又一個潛在「黃金交叉」出現嘅時候，再加埋恒指仍然被條向上走嘅保歷加通道包住之下，都仍然有希望上到29000點或以上，反正10點18分呢一刻恒指一度倒升了。(27447)可以續守。
作者阿珊，從事財經及投資版報道逾10年，由平面媒體走到網絡世界，《鐘擺戰策贏港股》作者。相信技術分析，專玩輪證，唔貪心，志在搵餐下午茶。
電郵：[email protected]；Weibo[下半part]：#Gladyshan#
