熱門:

2019年6月14日 即巿股評 港股直擊

【盤房來料】油價反彈僅屬一時 油股升勢可視而不見

美股終止兩連跌,隔晚三大指數反彈,道指升百點,三大指數齊升,港股噚日急跌之後,早段跟隨美股反彈,可惜有心無力,市場又毫無利好消息,港股今早反覆偏軟,半日交投淡靜,成交只有364億元。恒指今早低開113點後,曾收窄跌幅,見過半日高位27275點,無奈亦未能拗腰回升,跌勢更轉急,一度跌199點,低見27095點。恒指中午報收27153點,跌141點;國指則報收10436點,跌35點。

重磅股大部份腳軟,騰訊(00700)反彈告一段落,見過340元之後再未能突破,股價半日跌0.7%;友邦(01299)跟港交所(00388)分別跌1.2%及1%,大笨象(00005)亦跌0.4%,四股已佔去恒指過半跌幅。

隨住香港近日政治形勢愈趨惡劣,資金逐步流出香港,令本港拆息抽高,近日本地銀行高息搶存款戰已進入白熱化階段,預期未來日子,本地銀行嘅息差壓力將大增,點都會影響收入。東亞銀行(00023)已發盈警,股價半日急挫7.8%,成為本地銀行股嘅第一滴血。其他本地銀行股亦受拖累,中銀香港(02388)及恒生(00011)分別跌2.1%及1.7%,暫時本地銀行股都難有運行。

至於中東嗰邊嘅地緣政治風險同樣升溫,刺激油價急彈,三桶油半日逆市上升,但阿Man都係嗰句,環球經濟環境轉差,油價反彈只係一時,中長線亦難以扭轉弱勢,油價短線嘅反彈升勢,可視而不見。

講真家陣個市真係乏善可陳,缸邊友喺呢個充滿不確定性嘅時候,只有選擇離場,即使外圍炒聯儲局減息情緒再升溫,本地魚缸亦難以有何起色。港股喺現階段難見突破,幸而喺26500-26600點尚有不俗承接力,但27300至27400點嘅阻力唔細,喺月底G20峰會舉行前,港股傾向上落市格局,等待時局變化,謀定而後動。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads