熱門:

2019年5月24日 即巿股評 港股直擊

【盤房來料】避險資金流向中資公用股

中美貿易談判毫無進展,市場擔心貿易戰持續將拖累環球經濟表現,美股隔晚三车指數齊齊下跌,道指盤中更曾跌逾400點,雖然尾市跌幅收窄,但三大指數跌幅仍超過1%。華爾街嘅震盪令侵侵不得不再出口術,又話有信心跟中國好快達成協議,加上對華為事件態度轉趨溫和,港股乘勢反彈。不過反彈力度有限,恒指先升後回,升幅逐步收窄。
恒指高開101點,開市後曾升190點,見過半日高位27457點,即使人民幣企穩,A股由升轉跌,港股升幅收窄至24點,低見27291點。其後恒指喺27300點爭持,恒指中午報收27323點,升55點;國指則升32點,半日報收10433點。

大市反彈乏力,原因係騰訊(00700)動彈不得,雖然早段曾升2.1%見過332.8元半日高位,但半日升幅收窄至0.3%,報收327元。其實騰訊喺月中派嘅成績表都算交到功課,只係資金從科網股流走,加上又有指數基金減持,騰訊呢期弱得交關,不過基本因素冇變,前景阿Man仍然睇好,只不過君子不立危牆下,家下走勢弱就無謂博短線反彈。至於長線投資嘅貨底,擺埋一邊唔好睇,睇多兩眼盞心悒,至少要貿易戰結束,美國唔再針對科網企業,騰訊先可以再有運行。

油價插水,「三桶油」半日分別跌0.2%至1.3%,貿易戰下油價同樣易跌難升,冇貨喺手唔好多手,有貨喺手都要搵位逃走。至於另一個完全彈唔起嘅板塊濠賭股,今日繼續冇運行,金沙中國(01928)旗下酒店內賭場被搶300萬籌碼,保安咁水皮,股價半日跌3.4%。其他濠賭股跌0.4至2.9%不等。

至於處處被針對嘅科網股及5G概念,仲有手機設備股,今日個別發展,龍頭中國鐵塔(00788)見3個半月低位,跌穿咗1.8元已經走晒樣,之前股價喺2元樓上已到晒價,若然貪心唔肯食糊,家下貪字得個貧亦無得怨。

香港呢邊嘅防守股升咗唔少,資金卒之分流去中資公用股,水務股跟電力股上升,而燃氣股亦個別被追捧。阿Man建議睇睇華潤燃氣(01193),技術走勢唔錯,股價喺36元企穩,仲做埋個小圓底,短線有機會先挑戰38元甚至前高位40元,止蝕位就睇位36元一定要守穩。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads