熱門:

2019年5月23日 即巿股評 港股直擊

【輪證贏家】恒指熊劍指「大叔個女」

噚日揀咗隻恒指熊(58814),除咗朝早10點5分至10點20分打緊稿嗰段時間,同埋噚日[下半part]捉到嘅下晝1點5分至1點20分之外,喺3點5分至3點30分都見到恒指5分鐘圖SlowSTC(14,3)上到超買水平,呢三個位都係將(58814)放落場嘅好時機。依家9點59分,恒指跌逾300點,一度跌接近400點,如果噚日day trade咗隻(58814),今日見到呢個市況,傷心係應該嘅;但如果仲揸住(58814)或者其他熊/Put嘅話,咁咩位走都得啦。

今朝如常坐巴士返工,戰友阿Jack忽然有感而發:「感覺好似冇乜散戶入市咁... 」

我亦如常發噏瘋:「可能未瞓醒啫」而當時開咗市3分鐘到啦!

戰友阿Jack再嚟:「呢排感覺好靜,好孤獨咁,好似得番我同你仲係睇住個市咁!」

呢一吓我已經懶理隔離左右會同時望住我且覺得我係一個瘋婦,對住個電話爆笑咗出嚟,再真心問:「點解咁覺得呢?!因為噚日成交好奀?!」

戰友阿Jack三嚟:「唔係,身邊啲人都冇乜講股票咁...」如果係真嘅話,咁呢個應該係一件好事,因為當你身邊嘅同事都唔再講:哎呀!好想買維他奶(00345)呀!(唔係超市做緊特價嗰盒呀!),咁就代表個市好快見底了!」

真係咁Lonely?開隻app望望恒指,以當時我仲坐喺巴士準備落車時見到跌2XX點,到依家10點11分,恒指跌幅擴大至逾400點,啲錢鼠晒去險避,搶高晒啲Yen同美金,識得咁樣四散仲Lone乜鬼嘢ly呢?係咪噚日嗰條預言家話「9點中環會有7級地震」係講緊港交所(00388)大堂裡面大家都trade緊嗰條恒指咋?不過跌400點對老散嚟講都未去到7級嘅。(BTW,真心問預言家到底靠咩維生?不過呢單嘢令我諗起之前有人預測恒指嘅頂底,然後其實我可以每日都寫「依家XX點,恒指Keep住喺8000至40000點...」如果咁樣寫三次而我唔被人斬死嘅話,我叫我家老爺嗰晚加餸!)

依家10點18分,恒指keep住喺(哈哈)273XX點水平,跌緊3XX點,今朝向下一chok就chok死咗最貼價嗰三層牛證,total食咗2157張期指,變相依家最貼價嘅係27200至27299點,呢度有相當於398張期指。

按依家10點25分,恒指最低暫時做過27292點計,呢一層嘅牛證街貨未被殺晒嘅,不過個市似乎短線係以27100至27199點為目標,事關呢度有相當於842張期指嘅街貨喺度,係重貨區嚟架;情況就好似啲粵語長片咁,男主角討好個大叔嘅目的都係為咗佢個女之嘛,你估佢真係真心孝順個大叔咩!

不過唔好問我係邊套粵語長片嘅橋段,係我自己覺得啲粵語長片嘅橋段係咁啫,為咗大叔個女,恒指熊(59644),收回價760點(我唔想架,全城最貼價架啦!),槓桿比率約24.63倍係輸比同一收回價嗰隻熊證少少,但揀佢係因為佢得23.63%街貨,而另一隻就有成73.72%街貨,咁你話啦。(吼恒指5分鐘圖SlowSTC(14,3)上到超買先入,你懂的)

望望月曆,仲有一個星期就期結(下星期四,5月30日),即係話大家都就嚟捱完個「五窮」啦,are you ready for 「六絕」?

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads