熱門:

2019年5月17日 即巿股評 港股直擊

【盤房來料】市況未明少做少錯

美方代表團表示會繼續出訪中國進行談判,但中國呢邊就詐癲扮傻,表示唔知道美方有乜嘢安排,市場擔心貿易戰升溫,喺市況唔明朗嘅情況之下,港股懶理美股隔晚三連升,先升後跌。

港股跟隨美股高開,恒指高開152點,報28428點,經已係半日高位,除咗市場擔心貿易戰升溫,人民幣走弱,港股即掉頭向下,最多更跌304點,曾穿一穿250日線(27974點),其後跌幅收窄,暫時險守二萬八關及250日線。恒指中午報收28056點,跌218點;國指則跌63點,報收10747點。

至於阿Man認為可以趁低吸納嘅騰訊(00700),果然係有機會低吸,仲要一下已落到360元短炒支持位,若然係短炒嘅話,要睇實360元呢個位守唔守,呢兩日唔守,都係先止蝕。至於長線嘅,360元失守,要有心理準備有機會下試345元350元。雖然騰訊出完業績之後,大行意見分歧,但阿Man對騰訊前景有信心,家下騰訊補咗3月份嘅上升裂口,只要喺呢度個水平企得穩,騰訊其後仍能回勇。

其他重磅股表現好壞參半,手機設備股一如所料繼續插水,而剛公布首季業績瑞聲(02018)表現麻麻,股價半日跌3.7%。瑞聲咁嘅業績都算跌得少,反而舜宇(02382)、比亞迪電子(00285)及丘鈦科技(01478)跌近一成更加傷。板塊內其他股價普遍跌逾2%以上。人民幣走軟,內房股受壓都預咗,就連物管股亦被拖累,不過物管股下跌正好提供低吸機會。

資金繼續尋找避險股份,一向以收息為主嘅REIT有資金追捧,置富產業(00778)今早創上市新高,半日升2.1%,不過日前屢創新高嘅領展(00823)就見回吐,但跌幅唔夠1%,沽壓唔算大。

話咁快又到星期五,周末前夕,兼且市況唔明朗,缸邊友都以觀望為主,預咗成交額會縮水,恒指暫時守住28000,而期指則喺27700有支持。既然市況仍然唔明朗,都係少做少錯,happy Friday!

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads