熱門:

2019年5月16日 即巿股評 港股直擊

【盤房來料】醫藥股成為貿易戰嘅避險股

隔晚美股主要受消息主導,早段低開係因為侵侵舊事重提,表示有意提高外國進口美國汽車關稅,嚇到德國股市失魂,其後又突然改口話考慮六個月後先再調高汽車稅,歐洲股市即市鬆咗一口氣,由跌轉升。之後侵侵慌死好消息唔夠多,又話有信心中美貿易談判喺幾個星期有結果,美股低開高走,三大指數收市均上升。

至於恒指早段受騰訊(00700)低開所拖累,開市跌151點,再失100日線(28183點),跌幅更曾擴大至217點,見過28050點半日低位。其後港股跌幅收窄,更拗腰回升,最多升110點,見過半日高位28379點。恒指半日報收28336點,升68點;國指則升45點。半日報收10850點。

由於中美貿易談判轉趨不明朗,而噚日內地公布嘅消費數據又稍遜預期,市場預期阿爺好快會再出手,推出刺激經濟措施,有資金呢兩日已開始流入百業之母內銀股。建行(00939)及工行(01398)分別升0.8%及1.5%,內險股亦有唔錯表現。大笨象(00005)今日除淨,股價半日升0.5%,股東都算財色兼收。

噚日派成績表嘅騰訊,其實業績唔算差,雖然首季收入增長創上市後最低,但阿Man唔擔心騰訊之後嘅盈利表現,至少剛剛開始收費嘅《和平精英》已證明其吸金能力。加上其股價喺370元樓下見買盤承接,阿Man認為365元至370元嘅騰訊買得過,最多跌穿360元打靶,反正有數得計,幾蚊博騰訊上番385元都划算。

噚日阿Man已表示醫藥股算係貿易戰中嘅避險板塊,加上之前嘅醫改政策,有助行業整合,龍頭股幾時都可以趁回調吸納。不過上周阿Man點名叫留意嘅中生製藥(01177)股價節節上升,下周二公布季度業績,半日再升6.3%,股價已順利達標升至8元樓上。其他醫藥股全線向上,呢個板塊應該可以繼續跑贏大市。

至於已提醒過手機設備股避之則吉,果然侵侵忽然簽署行政命令,宣布將美國科技行業所受到嘅外來威脅,列為「全國緊急狀態」,擺明針對華為及中興(00763)。中興半日跌近5%,其他手設股全線向下,一早話咗喺貿易戰期間呢個板塊唔好沾手,唔係事後孔明。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads