熱門:

2019年5月7日 即巿股評 港股直擊

【盤房來料】港股反彈乏力 50日線阻力大

隔晚美股早段道指曾跌逾400點,其後中國代表團表示呢個星期嘅談判繼續,市場憧憬中美雙方仍有望喺周五美國向中國2000億美元關稅上調至25%之前,雙方仍有計傾,其後美股跌幅大大收窄,港股隔晚喺夜期同ADR都見回升,今朝亦順理成章高開。

恒指高開103點,報29313點,其後A股亦見反彈,恒指一度升270點,見過半日高位29480點,可惜50日線(29314點)未能企穩,其後升幅收窄,國指更半場倒跌。恒指中午報收29257點,升47點;國指半場則報收11225點,跌8點。

重磅股個別發展,騰訊(00700)早段曾升至378元,家下380元有阻力,半日跌0.2%,短線喺370元有些少支持,想買貨不妨等365元至370元。大笨象(00005)跟友邦(01299)表現唔錯,前者升0.3%,後者反彈1.4%。三桶油嘅中海油(00883)又嚟料,半日升2.7%,都係嗰句,石油股出晒名飄忽難炒,加上受油價影響甚大,完全博唔過。
喺中美貿易關係再度唔明朗嘅情況下,中資金融股自然較為疲弱,尤其內地券商股弱勢未改,普遍今日再跌逾1%。至於內銀股有大行調低投資評級跟目標價,內險股亦有啲腳軟,拖累大市表現。

不過醫藥股今日表現唔錯,阿Man今日喺其他媒體剛好推介咗中生製藥(01177),其實阿Man一向都話醫藥股中長線投資係可以逢低吸納,尤其兩隻龍頭中生製藥同埋石藥(01093),兩股都係靠得住嘅中長線投資對象。除咗呢兩隻龍頭,藥明生物(02269)亦係阿Man心水,股價半日升逾4%。

暫時港股喺中美貿易關係再度惡化嘅情況下,短線難以發圍,恒指50日線阻力唔少,未能企穩的話,港股走勢較弱。至於期指方面,就睇住29200點,短線亦成為阻力,今早上得到去亦係企唔穩。留意牛證街貨經過噚日恒指跌逾千點後仍未見減少,大戶鋸咗塊大牛扒後,未見好友退縮,反而牛證街貨仍見增加,小心大戶隨時借一個消息藉口,再震個市落去29000樓下殺牛。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads