話咗美股業績期唔好亂咁手多多做淡，雖然星期一晚美股有啲腳軟，但隔晚蘋果業績後股價升逾6%，波音業績亦超乎預期，股價亦升逾6%；盤後Facebook業績亦報佳音，盤後股價勁升逾一成。美股除咗有業績支持，聯儲局一如預期維持利率不變之餘，更放鴿沖喜，刺激美股顯著上升，道指盤中曾升逾500點，收市三大指數仍錄得不俗升幅，道指重上二萬五大關。
港股順住美股強勢高開199點，早段升幅曾收窄至131點，見過半日低位27773點，其後內地公布非製造業PMI勝預期，恒指一度重上二萬八關，高見28010點，升368點，創去年9月底以嚟高位。恒指中午報收27977點，升334點；國指則升162點，報收11059點。
唔覺唔覺道指見番二萬五，恒指亦重臨二萬八，若然畀1月開局嗰吓急墜而嚇親，甚至因此變咗大淡友，呢個1月真係過得相當慘。睇番港股由月初低位拾級而上，恒指累計升逾2000點，港股由二萬六，二萬七，至今日二萬八，一關過完再一關，表面看似動力不足，但實際上係靜靜地起革命，每次衝破一個阻力位後，稍作整固儲夠力又再上，一路以嚟升咗足足一個月。而阿Man留意到近呢個幾星期，期指總係高開後，尤其係以裂口高開嘅日子，第一口價見咗高位，即掉頭回落，呢吓咁嘅走勢，引咗唔少缸邊友誤以為升勢告一段落，當即市見淡友累積得咁上下，又總見再有利好消息刺激大市急升，往往都會打穿埋開市高位，其後就持續向上，一捉住淡友無得放生。
不過阿Man一直強調，喺牛熊證街貨仍然嚴重傾斜嘅情況下，大戶一直向上挾爆淡倉機會較大，結果係嚟到呢一段，淡友仍然死心不息，雖然27800至28000嘅熊仔已陣亡，但28000樓上至28199點都仍然有接近三千張期指嘅熊證未死心，若然今日再有死硬派淡友加碼，只會加強大戶繼續屠熊嘅決心。
大市估好唔使講重磅股當然有運行，之前阿Man已預計騰訊(00700)升勢放緩後，其他重磅股將後來追上，今日友邦(01299)跟平保(02318)分別升2.7%及3%，為指數貢獻不少。呢兩日亦一直強調中資金融股可睇高一線，除咗內險股同內銀股之外，中港兩地股市回穩並向好，內地券商股亦會有資金流入。之前提過嘅中信証券(06030)、中國銀河(06881)同華泰證券(06886)呢個鐵三角，今日半場均升逾2%。
講真濠賭股今年全年表現，阿Man確唔多睇好，不過下周係春節假期，亦即博彩及娛樂業旺季，濠賭股借勢借路落鑊亦好合理。不過無貨都係打死唔追，寧願吼番啲受政策或人仔回勇嘅股份，好似家電股跟航空股，今日順手睇埋潔淨能源股份，而今日嘅心水係金風科技(02208)，有留意開阿Man喺社交平台動向，應該都已留意到金風上周開始異動。
麥狄文
(徐狄怡‧證監會持牌人)
