本來中美貿易談判氣氛唔錯，雖然雙方未有達成任何實質協議，但下一輪更高級別官員嘅談判，將會喺月底舉行，到下一次談判前，中港美三地股市應該仲喺安全期。不過今早無啦啦有消息傳出，美國將正式向楓葉國提出引渡華為公主孟晚舟，道指期貨跌逾百點，滬綜指跌穿2600點，而港股亦失守27000。
恒指今早低開7點，開市後曾微升27點見27223點，經已係半日高位，但市場傳出不利消息，大市開始走軟，更跌穿27000點，盤中最多跌287點，見26908點上半場低位。恒指中午報收27921點，跌275點；國指則報收10580點，跌132點。
重磅股普遍腳軟，騰訊(00700)早段高開後即倒跌，中午報收333.6元，跌1.9%。噚日阿Man都講過，騰訊呢一輪反彈已達晒標，順利升至目標價335元至340元，由300元起步累計升幅超過一成，係時候考慮減磅甚至落實食糊。內地已批出第三批遊戲名單出爐，但93款遊戲當中，騰訊又無份，股價即跟呢個消息打倒褪。
中央重申要爭取今年喺重點慢性藥品價格上有明顯降幅，本來彈得好地地嘅醫藥股又被抽後腿，兩龍頭股中生製藥(01177)及石藥(01093)連續第二日下跌。兩龍頭醫藥股由低位反彈，累計升幅已達三成，加上股價日前已升至下降軌頂部，借頭借路回調好正常。之前已畀晒止蝕止賺位大家，仲繼唔繼續持貨自己決定。
內房少沾手為妙
上周急挫嘅佳源國際(02768)今日再大插逾兩成，有報道指大股東嘅部份持股被斬倉。上周五阿Man都提過，雖然佳源由高位已跌咗七八成，表現睇落股價大平賣，而公司亦已表示已償還1月份到期債務，但阿Man亦唔建議博反彈，甚至呢個板塊都要避之則吉。皆因今年係內房股債務到期高峰期，即使今次佳源過得到骨，又唔知幾時有其他內房股爆鑊，內房股過倒初一，又怕過唔倒十五，都係少沾手為妙。
睇番今日大市跌勢都幾全面，大部份板塊強強弱弱嘅都難逃一跌，之前累計升咗二千點有多，只要稍有不利消息傳出，回吐亦好正常。暫時短線支持位喺26800水平，剛好係10日線(26765)點之所在，呢個位都失守，100日線(26353)，即係約26400水平嘅支持會強些少，若果呢兩個位都失守，睇嚟呢個反彈浪好大機會玩完。至於上面熊證街貨喺27500至27600點係重貨區，唔排除再無其他利淡消息，喺26600水平至27000點整固下，仍有機會喺1月餘下時間挾埋呢幾百點上去殺熊。不過27300剛好係12月高位，要真真正正突破有難度，小心挾完呢浸淡倉，1月份期指結算後，港股或走樣變咗另一個世界。
麥狄文
(徐狄怡‧證監會持牌人)
