中美貿易談判又傳嚟好消息，除咗中國國務院副總理劉鶴，已定於本月30日至31日訪美，就中美貿易問題進行磋商，隔晚更傳出美國財長有意取消部份或全部中國商品徵數關稅嘅建議，令市場憧憬中美貿易談判好快會有突破性進展，刺激美股三個主要指數全線向上。雖然其後美國已否認有關撤銷關稅傳聞，但港股今日又裂口高開，成功挑戰二萬七。
恒指今早高開237點，其後升幅曾收窄至159點，見過26915點半日低位，甚後升幅一度擴大至354點，見27110點近個半月高位。恒指中午收報27013點，升257點；國企指數報10620點，升108點。
阿爺落力放水，降準同時又做逆回購，就算未能刺激大量資金流入股市，但市場流動性冇緊，唔打得都叫睇得，中港股市短線唔跌得去邊。重磅藍籌股個別發展，騰訊(00700)仍然喺340元前未能突破，新推出手遊仍待時間證明市場受落與否，話晒股價由300元邊起步，升至現水平累計升幅已超過一成，要再大幅向上動力有限，之前低位撈咗貨，都係時候考慮食糊。反而噚日阿Man提過有望接力向上嘅另一重磅股平保(02318)，半日股價再升逾1%，若然今日收市能企穩72元，料可繼續向75元進發。
噚日午後又一堆二三線股仔急挫，跌幅榜冠軍都唔算係股仔，而係晒士有番咁上下，早已被納入「港股通」嘅內房股佳源(02768)，被傳債務問題有無能力償還優先票據，被洗倉式拋售，股價大插八成。不過集團隔晚已發聲明，已確認已償還票息8.125厘，全數共值3.5億美元嘅優先票據，加上噚日有過億北水流入博反彈，股價今日報復式反彈逾八成。不過現價跟股價未爆煲前13元水平比較已水瓜打狗，唔見咁截，就算今日反彈七八成，公司市值都大幅縮水。上面蟹貨重重，尤其係喺5元樓上嘅蟹貨，未知何年何月何日方被消化，公司元氣大傷，股價要回復雙位數，睇怕有排搞。內房股早喺舊年中開始，阿Man已唔睇好，連龍頭企業萬達都高喊「活下去」，試問其他晒士細些少嘅發展商，實在唔容易捱過呢次中國經濟走下坡嘅寒冬。阿Man就唔多贊成博反彈，除非閣下身手敏捷，兼且純粹玩即日鮮，咁就自己執生。
反而早兩日獲大行唱好，而阿Man亦認為可以博反彈嘅醫藥股，喺國務院昨印發《國家組織藥品集中採購和使用試點方案》後，市場唔再見負面情緒，皆因之前政策一宣布後，股價從高位回落一半有突，已完全反映政策對行業嘅影響。以目前估計已重返合理水平計算，中線呢個板塊仍大有可為，不過識揀當然係揀龍頭股，阿Man首選都係兩隻藍籌醫藥股中生製藥(01177)同石藥(01093)。
麥狄文
(徐狄怡‧證監會持牌人)
