噚日捉咗隻恒指熊(68809)出嚟，但實在係搵唔到一個靚位，即使恒指5分鐘圖有上行嘅趨勢，但實在未上到一個嚴重超買嘅水平，最高都只能夠搵到下晝1點5分，SlowSTC(14,3)兩線上到「8」字頭嗰時膽粗粗送隻熊仔落場，仲要悶咗一個下晝心諗唔知聽日(即今日)個市點樣。擔心完一大餐之後今朝一早開電話見噚晚美聯儲加息，知嘅；但最新知嘅係份議息聲明，any肥，未知份聲明咩鬼樣之前，見到今朝電視機見到右下角日經粒數見紅，或者咁樣先至可以放下心頭大石。
依家9點46分，返到公司開晒所有嘢出嚟，再睇返恒指今朝跌142點開市，跟手就再跌深啲，首5分鐘最低見過25713點，搞到分鐘圖上今日第一支陰燭「大支嘢」咁，不過SlowSTC(14,3)就只係處於中軸水平。直至依家恒指回一回之後再跌過，點數上同今朝開市嘅分別不大，但5分鐘圖上嘅SlowSTC(14,3)就同今朝唔同，事關回氣再插就將條SlowSTC(14,3)向住嚴重超賣方向插落去。到依家10點正，5分鐘圖上見SlowSTC(14,3)%K線(17.297)同%D線(25.826)就到地咁滯，都係嗰句，個市悶到抽晒筋咁，(68809)唔走唔通等聽朝咩，就當呢個位走人就算，按噚日(68809)1點5分高低位$0.101/$0.100平均價$0.1005作為買入價計，10點2分見高低位$0.119/$0.115計平均數$0.117作為賣出價，16.4%已袋。
噚日喺[下半part]實在悶到發慌，於是就將一直以來收到來自四方八面嘅讀者email，統計一吓所問嘅問題邊款係最多，首選就更係「你覺得個市點呀？」同埋「XXXX好唔好呀？」，呢兩類問題出現率同password用「123456」嘅程度有過之而無不及。於是再抽咗三個大家都真係「忽發奇想」地問嘅嘢，就係：乜嘢街貨、溢價同埋對沖值(或者呢三隻嘢各自有咩用啦...sth like that la)。
街貨喺噚日下晝就講咗，依家就到溢價。唔知點解好多人會以為溢價同輪證價格有關係，溢價愈高、輪證價就愈貴，所以好多時有人會話「揀啲低溢價架啦，平啲呀！」或者大家對於「溢價」呢個兩個嘅concpet係：一支筆成本$10，依家本小姐賣你$12，咁我就賺$2，溢價就係20%。That's why會有一個「低溢價=平啲」嘅諗法出嚟。
其實，輪證嘅溢價係代表正股(即係相關資產)喺佢相關隻輪證到期日之前，需要升(Call/牛證)或跌(Put/熊證)幾多先可以達至打和嘅一個percentage。舉個例，某隻騰訊(00700)Call嘅溢價係10%咁先算啦，咁就即係代表咗呢隻Call到期之前，騰訊正股要升10%先至打和，由第10.01%開始，嗰0.01%先至係profit；反過來說，溢價愈高就愈難打和，所以啲人話傾向揀低溢價嘅輪證又係有原因嘅。
不過要留意一樣嘢就係，低溢價嘅輪證，同時槓桿都唔會高得去邊，事關輪證呢個遊戲根本就係「no pain, no gain」；btw，低溢價嘅出現亦都可能係隻輪證就嚟到期，即係末日嘢啦，或者正股派息，甚至隻輪係價內咗，所以單純/盲目用「低溢價」嚟做比較嘅(除非兩隻輪/證嘅條款完全相同啦)。
最後，啱啱收到一位好可愛嘅小朋友Alex Yu嘅聖誕卡，可愛嘅地方在於咩呢，就係佢年年都喺張卡度畫公仔，都畫得唔錯架！多謝你！順便多謝你支酒。
電郵：[email protected]；Weibo：#Gladyshan#
