噚日有提及過滙控(00005)列入監察名單，詳細解釋亦喺<下半part>度講咗，簡單啲就係滙控彈極都唔夠恒指彈得勁之餘，恒指就話穿咗條100天線啫，但滙控就掂都未掂到；再換條保歷加通道出嚟睇，由上個星期二(12月27日)到依滙控都keep住穿吓條保歷加通道頂部，本來見滙控噚日個位喺「上升通道」近中間位置，若然配合下方SlowSTC(14,3)兩線再上見「9」字頭嘅話，咁即係上到「上升通道」頂部，一切準備就緒之後，滙控自然就put得啦。但你見今日個市，都唔使添呀，港股未開見隔晚美股個衰樣就知一早就應該put隻滙控。
比較認識我嘅人都知我無耐性、唔等得同勁心急，所以亦都喺噚日<下半part>度揀咗隻中國海外(00688)出嚟，貪佢前日先嚟一支高開低收嘅實心陽燭，噚日再嚟多支陰燭，再補多槍嘅就係SlowSTC(14,3)%K(82.451)準備向下插穿條%D線(81.883)，於是就喺茫茫七隻中海外Put之中揀咗中海Put(27762)出嚟。拆返5分鐘睇，喺噚日下晝1點40至45分中海外SlowSTC(14,3)見超買，(27762)當時高低位做過$0.091/$0.090，平均數$0.0905就當作為買入價。留意返，你見坊間得七隻中海嘅Put就知係幾咁冷門先得架，依家9點51分，中海外做緊$26.95，跌0.185%，跌幅係少過依家恒指跌緊嘅1.56%，所以(27762)依家報$0.094，賬面暫時有3.86%利潤，唔貪心嘅情況之下就應該要收手；更何況中海外由星期二至今，股價跌嘅同時DMI嘅ADX都係下行，暗示呢轉跌勢力度並非強勁，純粹都只係跟市跌。
再望吓大市，早兩日就裂口高開，今日就裂口低開，咁多個裂口都唔知幾時先得閒去補，不過肯定嘅係，恒指連續兩日升穿保歷加通道頂，點都要回返落去保歷加通道裏面運行先啱規矩。拆開5分鐘圖睇，恒指一開市跌514點，所有技術指標都被呢一下拉到到嚴重超賣水平，到依家10點2分，恒指跌幅收窄至不足400點，做緊26865點，全因晨早啲技術指標被拉至極低位之後作出嘅鐘擺效應，將指標由一端向另一端出發，只不過依家彈到上中軸水平都未到。
反正頭先都mark咗個現價，順便開埋恒指牛熊證街圖睇吓啦，用現價26865點計，上方最貼價熊係27200至27299點，同現價爭335點先入到門口；至於下方牛證最貼價就係26300至26399點，呢度就爭466點先到門口；上/下行點數相差131點。鬥街貨嘅話，唔使審，一定係下行最貼價26300至26399點當相於1971張期指嘅街貨贏，上方最貼價嘅27200至27299點得588張，就算比多頭先計出嚟嘅131點差上行，即26865+466=27331點，豪啲啦，就當食埋27300至27399點嗰436張期指啦，呢兩part夾埋先得嗰1024張期指。
既然係咁，又爭咩呢？承上所指，恒指開市急挫後產生咗鐘擺效應出嚟，5分鐘圖見依家仲喺處於超賣同中軸之間嘅水平，比多少少時間觀察，到底個市有力上返去中軸以上，甚至係超買水平；還是根本hea到上到中軸附近，掂到少少都當完咗個鐘擺效應呢？暫定策略就係劍指下方嗰千九幾張期指架啦，但就留意住恒指5分鐘圖上頭先所講嘅位置，見佢真係無力嘅時候就用恒指熊(69351)插佢一刀，呢把劍嘅收回價係27790點，同現價有逾900點差距，退到咗遠槓桿比率都有約25.32倍，都足夠「被你刺傷~刺傷~」。(我咳到傻咗啦~哈哈)
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
