美股上周五表現反覆,雖然尾市跌幅較中段收窄,而美滙指數亦見回順,可惜資金流向反映避險情緒仍高漲,資金由股市流入債市情況不變,今個星期又有蘋果公司跟Facebook等科網巨企公布業績,再加埋就業數據公布,有乜冬瓜豆腐,美股隨時一命嗚呼。至於人民幣離岸價今早又再見6.96,拖累內地股市跌逾1%,莫講話熔斷底未能收復,一旦人民幣再破6.97邁向7算水平,上證指數分分鐘連2500點政策底亦不保。
至於港股今早則承接上周五夜期跟ADR嘅反彈勢頭高開,恒指裂口高開238點,高見24956已屬半日高位,其後高開低走,喺A股急挫拖累下,恒指一度倒跌逾100點,低見24595點半日低位,逼近上周低位24589點。不過暫時24600點水平仍頂得幾吓頭鎚,暫時好淡爭持,中午恒指跌幅收窄至16點,報24701點;國指同樣高開低走,盤中曾跌穿一萬大關低見9963點,中午險守一萬大關,報收10013點,跌44點。
市場焦點係中午派季度業績嘅大笨象(00005),上半場逆市升近1%,穩守於60元之上,走勢似乎預示第三季度業績仍見得人。結果不負股東所望,集團公布截至9月底止第三季列賬基準除稅前利潤59.22億元(美元‧下同),按年增長28.18%,勝預期。不過另一緊公布季度業績嘅重磅股平保(02318)表現迴異,半日跌2.7%逼近上周低位,半日報收72.35元,未知是否預示季度業績表現強差人意。
至於其他重磅股表現唔好得去邊,除咗友邦(01299)半日靠穩外,騰訊(00700)跟港交所(00388)下跌,騰訊更失守260元,睇嚟股價唔重上265元之上,尋底之路尚未結束。中資金融股普遍下跌,能夠跌少過1%表現算唔錯,上周曾提過可列觀察名單嘅人保(01339)更跑贏其他內險股,半日逆市微升,已算難能可貴。
港股喺明日期指結算前表現仍偏軟,睇嚟期指結算前,好友翻身已無望,雖然港股暫時喺24600點水平,亦即係下降通道底部總算守得住,但人民幣表現偏軟,內地股市無厘精神,港股即使已見超賣,仍難見較有力度反彈。
麥狄文
(徐狄怡‧證監會持牌人)