上周五港股跟內地股市齊齊下試年內低位，阿爺終出動四大天王開金口救市，不過中央推出嘅所謂救市措施唔算好勁，除非救市措施再加料，否則港股喺嚴重超賣下，完成技術反彈後，隨時又再掉頭向下。
恒指高開106點，開市報25668點，即係之前阿Man提過好多次，25600點水平一企穩，所有淡倉都要先撤退，因為短線反彈會展開，而挾淡倉可以相當狠勁，結果開市後升幅逐步擴大，恒指成功重越10日線(25773點)，更一舉衝破二萬六大關，半日高位26187點，幾乎完全回補10月11日嘅大型下跌裂口頂(26193點)。半日收市恒指報26173點，升612點；國指則報收10563點，升341點或3.3%，跑贏大市。
投資氣氛稍為緩和，成交即回升至半日626億元，藍籌股只有中電(00002)跟港鐵(00066)兩隻避險收息股逆市無得升，其他藍籌股全線做好。由於人行透露醞釀更大力度降費減稅及針對中小企融資難措施，中資金融股最受惠，四大內銀股升幅介乎2.4%至3.4%，內險股亦有不俗表現，平保(02318)半日升逾4%。多隻內地券商股升幅更逾一成，不過阿Man唔建議高追券商股，始終內地股市積弱，唔係一時三刻可以解決，而歐美股市更被多個不明朗因素所困擾，一旦歐美股市有乜冬瓜豆腐，唔見得港股可以獨善其身。
騰訊(00700)半日升2.7%，盤中最高見289.8元，都係睇番292元呢個位，跌穿後由支持位變成阻力，已博騰訊反彈，呢個位見好要收，可能到此又行人止步。反而平保都算厲害，果然係眾多中資金融股中表現最好，上周下試72元支持後反彈，今日已重返之前下跌裂口之上，呢次反彈或有望上試78.5元水平。至於大笨象(00005)僅升0.7%，暫仍未能收復65元失地，後市仍有機會下試62元，甚至跌穿60元水平。
港交所(00388)連續兩日勁彈有啲始料不及，目前已較快一步成功收復20日線，未知大市能否再向上挑戰20日線(26569點)及50日線(27150點)，暫時先睇220元，過唔番220元企穩，反彈或又告一段落。
記住港股跟內地股市目前仍處於熊市之中，短線超賣作技術反彈好正常，但要成功擺脫劣勢，似乎言之尚早，今次反彈除咗係阿爺出手救市，周三港珠澳大橋通車，北大人南巡都要畀吓面，小心呢一切粉飾太平嘅反彈嚟得短暫，若然歐美股市有乜頭暈身㷫，港股隨時打回原形。
麥狄文
(徐狄怡‧證監會持牌人)
