噚日身痕做paper trade試吓揀隻牛證嚟玩吓(想捉轉角市飲頭啖湯，用呢個方最好，唔使錢嘛)，結果就更係失敗啦；但無所謂，paper trade之嘛。失敗咗之後我發覺呢期少睇一樣嘢 ，就係恒指牛熊證街貨圖，噚日收到讀者Ka Ming問我「你覺得26000點穿唔穿？」，我答佢「我覺得穿」，因為一開個牛熊證街貨圖，見到26100至26199點呢度噚日睇已經過千張期指，今日再睇1377張，而按依家9點55分止，恒指最低做過26067點計，呢個位嘅牛證都已全數陣亡；再睇落去26000至26099點又係一個整數關口位，呢度有1255張期指，又係最重貨。同樣地按恒指暫時做過低位26067點計，其實只係爭67.01點就已經可以殺死埋呢堆重貨牛，不過依家10點3分見到恒指跌幅唔止收窄，係由今朝早開市嘅升轉跌再跌轉升，現報26242點，升39點。
坦白講呢兩三日都有唔少email問我隻Put/熊/沽期指仲繼唔繼續/過唔過夜類似嘅問題，而我嘅答案都係一樣：有得食嘅可以先食一半，留一半繼續/過夜乜都好，主要原因係大市連跌咁多日且之前跌幅都唔細，好難再每日都用同樣嘅波幅/點數向下再殺，基於鐘擺殺到落底點都要彈嘅時候，就係大市出現轉角嘅時候，喺此前嘅呢段時間，如果將手上嘅貨食一半，留一半，每日如是，將自己手上嘅注碼減磅之餘，仲可以順住個勢繼續食去，當然係唔會比一手揸到尾嘅食得咁多，但係先將盈利袋咗落袋，變成實錢先至係落場嘅終極目標嘛(我諗應該無人只係鍾意賬面贏而不在乎實際贏同輸掛)。
今日再睇市，依家倒升緊98點，做緊26300點，認真大戶真係唔係開善堂，26000至26099點咁鬼重貨都遲早嘅事，除非手揸呢堆重貨嘅人見到今日個勢想殺穿26000點呢個位時，快手放走晒呢堆貼價牛證，搞到呢度已經唔再重貨，或者大戶先會放你一條生路(其實係你要自己肯走同走得快)。
另外，再睇返恒指日線圖，SlowSTC(14,3)%K線(8.535)同%D線(12.034)殺到落個位數水平，而9MOM都開始落山，最正嘅係個低位26067點同保歷加通道底(25995點)只係差72點，如是者穿一穿再上，又符合到要食重貨嘅貪心大戶要求，又可以順返技術分析要觸底反彈。
依家個情況，我繼續用返噚日個方法，即係paper trade入牛證作為試轉角位個水溫有幾高先。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
