放完一日假返嚟,好似所有嘢都重新洗牌嚟過(可能係無貨過夜掛)。依家9點47分,恒指做緊27761點,升161點,日線圖上恒指仍然於保歷加上升通道;換條天線睇,上周四(9月20日)升穿過50天線後,到依家都仲未爬得返上去;但留意返,10天線(27266點)向上兜緊,就嚟升穿20天線(27352點),亦即係話好大機會就有一個久違了嘅「黃金交叉」出現。
不過,老老實實,10同20天線生出嚟嘅「黃金交叉」,威力點都大唔過50同250天線生出嚟嘅「終極黃金交叉」,BTW,你見SlowSTC(14,3),%K線(84.594)同%D線(81.482)兩線就嚟上到「9」字頭,即係話嚴重超買嘅時候又到;再加埋條「下降通道」就見上星期四升到上「下降通道」頂之後,就開始慢慢落返去,會唔會係遇頂回落,個市又趁10月金融海嘯真真正正10週年,殺人一個措手不及?
望埋恒指牛熊證街貨圖,依家10點6分,恒指做緊27681點,升182點。上方熊證最重貨就係28000至28099點,呢度有相當於1561張期指,同現價比就相差418點,若再加埋最貼價嘅熊證嗰427張期指的話,全部就可以食到1988張期指。
至於下方牛證喺27200至27299點都有1060張期指架,而同現價比都只係爭481點,咁樣計點數上的確係比上行嘅多,且期指張數又比上行嘅少,之但係兩者相差63點同928張期指,望望月曆今日9月26日,聽日就期結,依家10點20分恒指點數反而無乜大變動,會唔會個新市依家選擇坐定定喺度嚟等貨入,到儲夠佢心目中想要嘅貨啦,過埋期結再一次過大啖大啖咁咬落去呢?
個市想點行暫時都仲未有明確方向,喺呢啲時候落注,Well,你知我唔會架,因為同賭大細係無乜分別,今日上晝就抖多半日,睇埋下晝個市想點再算啦。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan