上周港股本來彈得好地地，奈何「侵侵」又玩嘢，堅持數未傾掂稅先抽，講到明有關中國2000億美元進口商品關稅一定照收，呢個消息一出，上周五晚港股喺夜期跟ADR時段即插水，今日開市跌勢更因風災過後加劇。唔少缸邊友鬧爆指今日唔少人難以如常返工，又有人因為風災停電停水，噚日要救家園而疲於奔命，仲邊有心情入場炒股，劫後餘生又確係無乜心情炒股。
實情外面交通狀況仍未恢復正常，至少巴士服務仲未搞掂，地鐵東鐵線又無左一大截，咁嘅情況仲要返工，只有亂上加亂，仲會阻礙清理進度。不過香港呢個國際金融中心，停市一日咁大損失，話之你返工要花上大半日，總之市照開，股照炒，大戶一樣要做世界。阿Man想講嘅係，今日咁嘅成交額，大戶要做世界份外容易，成交少少舞高弄低不費吹灰之力，呢個情況醒目缸邊友當然靠邊站。暫時大市喺26800點有支持，反彈完結與否能以作實，今日風後影響成交特別奀，加上唔少缸邊友都等埋2000億美元關稅公布，建議呢一刻按兵不動，無謂入場做大戶點心。
恒指低開256點報27029，開市後曾高見27037點後，二萬七關失守，10日線(約26970點)亦相繼失守。喺內地股市拖累下，港股跌幅曾擴大至跌523點，低見26763。恒指中午報26856，挫429點；國企指數報10423點，挫151點。半日成交額得368億元，全日成交額可能又唔夠800億元。咁嘅成交額，係咪值得用人命去換取。唔少市民都認為今日香港應酌情停工停市，明白喺天氣狀況唔再惡劣下，政府好難作出決定，但私人機構顧主係可以彈性處理，而港交所亦有宣布停市嘅決定權，點解唔考慮一下普羅大眾困難之處，係要打工仔搵命博都要返工開市!!!!
全城交通癱瘓，今朝一早玩殘全港打工仔。其實政府帶頭作表率，非緊急部門既公務員停工一天，並鼓勵私人公司效法，以減輕公共運輸壓力。咁嘅情況特事特辦，於大型天災後可視乎情況後宣布全港放假。但係政府只係墨守成規，總之唔掛八號風球就要返工，冇情講。睇見新聞有人因為上班途中被大樹壓倒昏迷，只能嘆句人命何價!! 值得一贊係逼東鐵返工嘅市民，喺大圍站過千人候車逼爆站嘅情況下，仍能秩序井然，實在不可多得。另一方面要鬧爆坐地起價嘅的士司機，由新界東出灣仔竟開天殺價收取過千元車資，叫一個打工仔情何以堪。
講咗咁多唔關大市嘅嘢，係因為阿Man實在不吐不快，唔少行家中環之友，今日盤房冷冷清清，有啲行家話好多同事返唔到公司，但因為開市關係，總得有人喺公司坐陣。再見到今日半日嘅成交，似係冇成交下乾跌，又畀機會大戶做世界。
最睇唔過眼係藍籌股幾乎全線仆直，但長實集團(01113)竟然逆市升0.5%，成為最佳表現成份股，呢吓先叫人最唔忿氣。大佬呀，噚日睇住個公仔箱，眼見好多爆晒玻璃嘅大廈，無論商廈定係住宅，出事率最多正正係超人出品，今日股價仲要逆市升，都咪話唔吹漲!!!
麥狄文
(徐狄怡‧證監會持牌人)
