噚日我同我家老爺兩個全日都喺屋企，望住屋企對面個油站，啲鐵板係咁吹晒出嚟，幾驚佢一個唔該向上吹就啪中我隻大窗(就算我已經用咗五卷膠紙都係咁話啦)；但突然間聽到「砰」一聲，無理老爺嘅口頭勸籲八掛開門出去睇，原來同層走廊盡頭嘅一隻玻璃窗爆咗，於是打電話叫管理員上嚟，佢哋都好快手釘住塊木板頂住先。
山竹嘅威力真係好強，唔知係咪吹完香港之後，嗰後續留咗喺港股。依家10點18分，我總算平安返到公司，同行家兼同學仔Milk互相報完個「公司平安」之後，個市最多跌逾500點，最低見26784點，個藉口就係話貿易戰可能升級。
原來諗住佢好地地繼續向上殺27600至27699點嗰堆重貨，誰不知今日一插，以暫時見過嘅低位26784點計，26900至26999點嗰342張期指，同26800至26899點嗰199張期指，就好似塌樹咁冧晒，呢度夾埋冧咗541張期指；而下方牛證最重嘅街貨，就喺26200至26299點，呢度有1021張期指。
返番去睇恒指日線圖，依家10點33分，恒指今日開市同暫時高位都一度抓緊10天線(26969點)，咁依家當然無啦；換條保歷加通道出嚟睇，事實恒指由8月31日到今都係處於保歷加下降通道。假設大市弱勢未改，而目前按保歷加下降通道(27482至26218點)作上落嘅話，咁現水平恒指又處於保歷加下降通道嘅中間位喎，確係尷尬架。
依家10點42分，恒指現價做26855點，用呢口價去計同牛熊兩邊重貨區差距嘅話，上方熊證重貨就係27600至27699點，呢度同現價差844點；下方熊證重貨區26200至26299點就同現價差655點，兩邊都係咁遠；再望埋恒指波幅指數，今日粒數就彈起少少，但原來上週四(9月13日)做過一個下跌裂口出嚟，雖則慣常睇嘅SlowSTC(14,3)仍然發出看淡訊號，不過見MOM(9)同14RSI都有吹好風嘅跡象，會唔會就趁「貿易戰可能升級」吹多一下，令個市再向上/下chok出一個大點數，同時又可以令到條波幅指數補裂口呢？
恒指熊(62584)，收回價27538點，同區附近收回價嚟講槓桿最高，只係街貨嫌多咗啲(我明，咁即係受歡迎嘛)；揀熊嘅原因係見大市下行嘅點數始終少過上行，而期指張數又可以食多啲，況且沿途都有唔少貨可以「掃街」咁掃；仍以吼5分鐘圖見超買見落場。BTW我見恒指5分鐘圖由今朝10點10分開始，SlowSTC(14,3)由%K線同%D線嘅個位數字，回升到依家(10點54分)嘅雙位數仲見「2」字頭，但恒指個走勢仲係一條橫線，假設繼續咁落去，唔知到SlowSTC(14,3)超買回落時，恒指仍然都係一條死魚咁，還是跟落呢？
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan
