隔晚美股個別發展，但港股今早則繼續偏軟，但阿Man都講過，大市個幾星期之內，累積跌咗二千點，嚴重超賣過後有反彈亦唔出奇。港股今早開市後好淡爭持，淡友暫時未肯放過好友，但好友嚟到26500點水平，亦開始出番啲力死守。
恒指低開一點後，曾跌近百點後拗腰，一度升77點，見26691點半日高位，其後跌勢再現跌過百點，最多挫166點，低見26447點，再創近14個月低。不過當A股半日收市前倒升，港股跌幅亦大大收窄，中午恒指報收26606點，跌6點；國企則跌34點，報收10399點。半日成交得番453億元，睇嚟缸邊友喺現水平唔多願出手，買賣兩閒。
唔少缸邊友話大市咁樣陰乾唔係辦法，寧願一腳大大力直踩落23000點更為痛快，但要引發幾千點急挫，除非有更壞消息，即使呢一刻「侵侵」宣布即對中國2000億美元進口商品徵收25%關稅，頂多可能都係跌多一千幾百點，即係落到25500點水平，甚至喺二萬六邊已刹車。要引發大型跌浪，除非出現系統性風險，暫時最有可能爆發系統性風險嘅地方當然係新興市場，但睇番新興市場呢幾日表現，似乎暫時受到控制。至於另一個會爆發較大型危機嘅債券市場，炸爆無疑係蘊釀中，但距大型爆發仍有一段距離。
港股目前處於熊二之中，熊市最大特式係陰乾，即係成交愈玩愈縮水，而走勢呈一浪低於一浪，期間每次急跌後，均見反彈，只係浪頂跟浪底一直向下，形成一條下降通道。睇番牛熊證街貨分布，呢一浪大市可能跌至26200水平都夠皮，大戶再殺埋最後一批肥牛，或者會收手，屆時亦係好友喘息跟反擊機會。只係反彈力度愈見疲弱，即使落到26000至26200點水平反彈，可能亦難以升穿27400點水平，尤其係結算過後，27250點至27350點，曾經係一個重量級交易區，即係嗰個位可能係淡友重注淡倉其中一個區域，又豈會讓好友輕易攻破。記得上月底結算前，另一個重量級交易區喺28200點，呢個位相對現水平更遙不可及，即使大市短線超賣反彈，都難以重越該水平。
重量級股份跌勢亦有所收歛，但個別板塊如濠賭股跟手機設備股沽壓仍然沉重，能夠止跌已經要炮仗，暫時難望止跌後可回升。好似騰訊(00700)已開始出手回購，可惜公司回購態度仍保守，即係話公司亦覺得現水平未係大舉掃貨嘅時候，出手回購只係望可以穩住跌勢，要扭轉跌勢回升，騰訊未有耐搞得掂。
麥狄文
(徐狄怡‧證監會持牌人)
