|
熱門:

2018年9月7日 即巿股評 港股直擊

【盤房來料】港股反彈乏力等終極一跌

隔晚美股各走各路,道指結束四日跌勢,雖然早段曾跌近百點,但尾市收復失地倒升20點散場,但標指跟納指續跌,尤其科技股沽壓較大,納指又跌近1%收市。至於港股今日表現反覆,恒指低開78點報26895,早段喺A股帶動下曾最多升221點,高見27196點。可惜亞太區內股市普遍下跌,連早段上升嘅A股亦轉跌收場,港股只有跟大隊,齊齊隊,由升轉跌,盤中曾跌305點,低見26670點,再創超過一年新低。中午報收26744點,跌230點;國指則跌57點,報收10520點。若然今日港股收市低過26787點,即由今年1月高位計跌兩成,即港股已步入技術性熊市。

不過無論死亡交叉或者技術性見熊都好,大市通常未必即時插水深潛,反而會先反彈再跌,但6月時阿Man已講咗港股熊蹤處處,確認入熊,熊市要跌見多先真正見底,不妨用過去廿年,之前三次股災作參考。睇番98年亞洲金融風暴嗰一劑,由97年高位16820點插水六成,至98年嘅6544點先見底;而科技股再加沙士連環擊,由2000年高位18397點,跌至03年8331點,跌54%後熊市方結束,而2007年嘅次按危機再加2008年金融海嘯,則由2007年高位31958點,跌66%至2008年10月嘅10676點先見底。若然今次浪頂係今年1月嘅33484點,跌五成係16742點,當然呢個低位多數今年內唔會見到,皆因對上三次熊市,最長可經歷三年,但以一年至年半為時限,即係明年中之前,指數有機會低見二萬樓下。

至於今次呢一輪跌浪,幾時有得反彈呢,本來阿Man預期反彈或於今日最早出現,事關恒指日線由28500點雙頂回落,已跌至保力加通道底部26842點,而噚日跌至呢個水平附近亦即市見反彈,可惜今早港股低開反彈至27200點之前又掉頭,再度回落至26900點之下,急挫至26670點,雖然收市前重返26700水平,但未能重上26900點水平,暫時難確認短線見底。不過大市若能重返26900點企穩,並進一步回升至27200-27300水平,則呢一輪跌浪完成,將展開短線反彈。不過港股市底實在弱過藥煲,若然今日未能重上26900點並守穩,將繼續向26200點出發。

番牛熊證街貨分布,大市落到26200點水平,剛好做瓜所有牛證街貨,而熊證呢,最近一個重貨區喺27900點,仲遠過由中環去沙頭角,暫時似未有誘因要挾上,睇樣大戶短期都係先劏肥牛再儲熊。缸邊友問若然熊證街貨一直喺無雷公咁遠,個市仲有冇得彈,講真一句,家陣利淡消息十面埋伏,而好消息只有侵侵肯放過美國嘅貿易夥伴一個咁大把,仲要係呢個可能性極低,港股繼續以一浪低於一浪形態向下推進,期間嘅小型反彈,可能愈見乏力,目前都係等緊終極一跌,至於呢個日子係幾時,阿Man無水晶球,自然未能未卜先知。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。