上周五美股表現平淡,而中港兩地股市表現反覆,早段喺人仔急挫下再創半年底位,至午後又傳阿爺入場干預,中資銀行大手掟美元,人仔低位大幅反彈,再加上侵侵出口術表現美元過強唔係好事,人仔得以有喘息機會,短線終止跌勢展開反彈。缸邊友滿心歡喜,以為反彈有番咁上下力度,可惜事與願違,喺火車頭騰訊(00700)頭耷耷之下,港股反彈力度只係一般,甚至可以話相當削,始終市底弱已成事實,後市都係瓜多過菜。
恒指高開74點,早段曾升167點,見過28391點半日高位,可惜受制20日線(23448)點又再掉頭,盤中曾跌133點,見過半日低位28091點,表現反覆。中午報收28266點,升41點;國指則升56點,中午報收10739點。半日成交額422億元,上周五千億成交或能復見,可能成交額又再次回復平淡。
騰訊好明顯阻住大市彈,開市價經已係半日高位,開市後級級落,盤中曾低見369.2元,再創今年以來新低,中午報收369.8元跌1.8%。睇個勢騰訊仍要向下尋底,而牛證街貨重貨區喺360-370元,壓住低價劏牛係合理推測。至於下一個較有支持嘅位置喺350元,亦即係去年9月中至11月初嘅橫行區。騰訊死咗火,港股亦難有運行,再加埋兩大手機孖寶瑞聲(02018)跟舜宇(02382)雙雙下跌,前者失去紅底股身份,後者則跌137元之前嘅橫行平台,走勢認真麻麻。
至於內地金融股繼續反彈,皆因內地理財新規執行細節落地,借消息反彈,咪以為中資金融股已見底回升,只係死貓彈咁上下。唔少粉絲都問內銀股跌咗咁多,家陣買嚟收息係咪有着數,阿Man只能講句,年息率超過5厘係假象,若然年內股價跌幅超過5%,收埋息亦唔夠補番本金損失,切記莫因小失大,收息變坐艇。
內地又爆有黑心疫苖,深圳上市的長春長生生物科技(002680.SZ)被爆有疫苖造假,醫藥股今日插水。雖然石藥(01093)半日跌咗4%,係半日跌最多藍籌,但以呢單新聞嘅利淡程度嚟講,醫藥股算跌得少。之前阿Man都講過升得勁嘅板塊,好易成為提款機,但睇番今日市場對醫藥股呢單利淡新聞嘅反應,沽壓又唔算太嚴重,缸邊友都算克制。
麥狄文
(徐狄怡‧證監會持牌人)