噚日個weibo唔知點解upload唔到相，搞到我諗住同大家開心share吓到底戰友Jack嘅太太整咗咩正嘢比我食，認真，唔係咩驚天地、泣鬼神嘅珍饈百味，只係一粒細細嘅丸子，但重點在於戰友太太晨早起身整好再比戰友Jack帶返工之餘，有一粒寫咗我名嘛！
不過，好彩噚日個weibo都仲可以upload到啲字，策略上按順勢而行所以買，揀出嚟嘅恒指牛(60726)喺下晝1點10分至15分，見恒指5分鐘圖SlowSTC(14,3)出現超賣，呢個就係買牛證嘅好時機，就按(60726)最高同最低嘅證價($0.091同$0.088)拉個中位數$0.0895作為買入價計，去到下晝3點15分到，恒指5分鐘圖SlowSTC(14,3由超賣變成超買，超買到%K線見100，呢個時候就梗係要將隻(60726)收割啦，按恒指5分鐘圖上由噚日下晝3點10分至3點25分，SlowSTC(14,3)都keep住超買嘅時候，(60726)高低位拉個平均數($0.0985同$0.0975)再拉個中位數$0.098作為賣出價計，兩個鐘到就有約9.5%嘅賺幅，可能你會覺得唔夠喉，但買輪證咁短線嘅投資，再見到SlowSTC(14,3)嘅%K出現100，係一個鐘擺到咁極端嘅時候，你都唔放走你啲牛證/Call輪，咁真係無你辦法。
再睇返今日個市，今朝一開見31009點，依家10點19分，高位暫見31036點，叫做升穿過吓條100天線(30982點)，依家當然無啦；「咁晏先嚟講圖」，唔係我今日晏返，只係今朝早一返嚟就同同事開咗個緊急會議，議題係：安裝蚊網。我好認真架，唔好笑呀，當你遇過早幾日作打風有隻超級大小強硬闖入屋，較早前更遇過有蝙蝠飛入屋嘅話，你就知道呢樣嘢嘅重要性！「有蝙蝠入屋？」係呀，仲玩咗我成大半個鐘呀，我真心希望佢係明白人類嘅語言(尤其係粗口)。
依家10點半到，見恒指今日似係高開低收仲要倒跌嘅情況，就算由上個星期三(5月30日)開始至今生咗條「上升通道」出嚟，令到MACD同SlowSTC(14,3)都發出利好訊號，但係見14RSI處於中軸水平；恒指頭頂無啦啦有條100天線阻住；最正嘅係DMI嘅ADX自呢條「上升通道」出現到今，數值愈嚟愈細，市愈上但ADX就愈細，咁就代表個市無力上，無力上又代表啲乜？你話啦。
開恒指牛熊證街貨圖睇，恒指最高點仍然係今朝見到嘅31036點，而最貼價嘅熊證就係31000至31099點，即係話以最高位嚟計恒指已經踩咗入熊證最貼價嘅街貨範圍，而呢度就有593張期指。成個恒指牛熊證街貨嘅分布，好明顯係熊證多過牛證，以恒指牛熊證1000點差距期指張數比例睇，牛：熊=1：9，無他嘅，鬼叫條「上升通道」生咗出嚟兼依家係傳說中嘅「6月窮」，唔止，今年亦係四年一度嘅世界盃，仲有8日(6月14日)就開鑼，喺世界盃年對股市有個不成文嘅影響，就係股市會喺世界盃進行期間成交會少，正常呀，四年一度+賭波合法化，成個地球嘅球迷都就賽事玩兩手，講真我都會去買廿蚊啦。
但事實係上面啲熊證街貨有好多，無理由唔食嘅，唔通個市慢慢上行食熊(ADX無力嘛)，之後到開波就向下番(可能食晒啲熊證啦嘛)，就用保歷加通道玩，依家恒指處於保歷加通道中軸，以頂部(31494點)為估計佢慢升嘅目標先啦。恒指Call(19410)，行使價31200點，輕微價外且成交活躍，仍然小注為上。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；微博#Gladyshan
