Yo! i'm back!悠長期假終於結束，不過我想講做online嘅其實唔理你放唔放假、個人喺邊，嘢都係搵你照做。喺泰國經歷咗「黑色星期五」(3月23日個星期五)、隔兩日又經歷咗「Data死亡之旅」(3月26日個星期一)、再隔多兩日又嚟多滯「血腥星期三」(只係講緊3月28日嗰星期三咋)，你睇我呢個期假幾咁精彩！(唉~)
呢排最吸睛嘅都莫過於股王騰訊先後被大股東南非傳媒集團Naspers同總裁劉熾平減持，一減之下由原先470幾蚊殺到落今日連大股東配售價405蚊都無。就係騰訊開始築起「下降道通」之前兩日，亦即係我臨放水前一日，我哋位同事Wilson斥資買入騰訊，呢位哥仔好明顯就係公司嘅一盞明燈，佢嘅代表作係上屆世界盃買乜輸乜(除咗最後嗰場總決賽之外)，然後一個連「越位」都問咗九萬幾次到依家都仲未明嘅我，每次落注買Wilson嘅對家，完咗個成界盃之後，胡里胡塗地贏到兩杯珠奶茶，仲請返佢飲添！戰績講完，而今日返嚟呢位「燈神」仲未放隻企鵝，理得佢日線圖上SlowSTC(14,3)跌到落嚴重超賣水平，暫見400蚊雖然有支持，不過頭頂條10天線(433.44元)同條100天線(425.49元)一旦相遇且形成一個「死亡交叉」嘅話，恐怕都可能要到落上年成個10月形成嘅「長方形」(約345至356元)見。
正所謂：騰訊的日子如何，恒指的日子也必如何。其實日線圖睇恒指走勢同騰訊真係沒兩樣，依家10點33分，恒指做緊29794點，最低做過29755點，開恒指牛熊證街貨圖睇，下方最貼價嘅牛證係29800至29899點，呢度有相當於996張期指，以恒指低位計呢層已經全數被打靶，變相29700至29799點呢度成為現市最貼價牛證區，而呢個位置有相當於717張期指，再落多100點，即29600至29699點，都有705張期指standby，為數唔少嘅情況又近之下，恒指的確有繼續下行嘅理由。
至於上方熊證最貼價嘅係31000至31099點，呢度有相當於626張期指，若現價起步反彈1305點嘅話，咁就可以食得晒啦；不過，咁睇你都知道係費時失事啦。恒指熊(59379)，收回價 30238點，約46倍槓桿屬高水平，仍然吼恒指5分鐘圖見超買時入市，以day trade或一兩日貨仔為上，小注好啦！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]
