噚日恒指裂口高開之後就一直下行，諗住等佢下行完之後回彈就隊隻恒指Put(19419)落場；上晝個市都未收我就急急腳咁離開公司落中環，事關一早約好咗幫我寫家居風水嘅一位堪輿學家柏天心食Lunch，同枱仲有被我打擾咗N次嘅秘書小姐，仲有大師嗰位年輕財俊嘅公子；飯後仲帶我去參觀大師嘅Office。返到公司班八卦同事問我「大師有無贈你兩句嗎？」「我諗人哋本身已經夠晒忙啦」所以好多謝大師你噚日嘅招待！
坐底開番啲電腦同電視之後再開恒指圖睇，根本唔需要擔心幾時先可以將揀好嘅(19419)入市，恒指5分鐘街貨圖嘅SlowSTC(14,3)，由下晝1點半開始，到3點鐘都keep住超買，要驚就驚揸住隻Put輪一直見住個市係咁上，呢頭話升逾600點，句嘢都未打完就話升逾700點，跟都跟唔切。Well，反正揀好嘅都係輪唔係證，至少唔會輸打靶；再加上條20天線都仲未破，即係話噚日講嘅「山頂纜車」圖仍然健在，就比一晚時間隻Put啦！
今朝早起身無咩點睇新聞(只係開住咗部電視機，因為C9朝早都可以好忙，掃個地、收個衫就已經夠鐘出門口)，今朝坐地鐵返工途中恒指完咗個U盤，開市報30323點，跌187點，(19419)輪價即時反彈；按噚日可以入市時段(19419)最高價同最低價計個平均數作為入市價(0.124+0.114)/2=0.119嚟計，只要能夠喺今早開市頭嗰15分鐘掉走隻(19419)嘅話，咁多就可以食到九格；最少就打個和(但輸手續費)，夠唔夠快就睇你當下嗰刻夠唔夠果斷啦。
依家10點12分，恒指今朝個裂口已經補咗，兼且由於時間關係，暫時高位做出30673點，即係升穿咗條20天線(30626點)，咁最終有無力真係可以企穩係20天線樓上就要再拭目以待啦。依家10點16分，恒指做緊30513點，就用呢個點計放上恒指牛熊證街貨圖睇，上方最貼價嘅熊證係31000至31099點，呢度有相當於365期指，如果大市由現價起on top再升多586點嘅話，咁呢365張期指就可以全數食晒。
至於下方最貼價嘅牛證就係29800至29899點，呢度有相當於1063張期指，係就係夠多，但要大市由依家下行713點咁遠呢。再者，若然大市真係上行殺熊，先行586點食31000至31099點嘅熊證；努力啲行多100點，就可以食到31100至31199點嘅熊證， 度都有成960張期指架，兩疊貨加埋就有相當於1325張期指，都唔惹少架！
「咁快斷定要入牛？」唔會，雖則日線圖前日同噚日粒燭呈「身懷六甲」，但係…都係睇埋企唔企得穩條20天線先講啦。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
