噚日恒指Chok到隔夜飯都嘔埋出嚟，高低波幅有成600點，因應噚日個恒指牛熊證街貨圖嚟預測恒指有機會向下衝殺30400至30499點同埋30300至30399點呢兩個最貼價又重貨嘅範圍，如是者揀定隻恒指熊(57238)，坐定定等恒指5分鐘圖見超買落場。係朝早11點至中午收市，同埋由下晝2點45分至全日收市前呢兩段時間，恒指5分鐘圖嘅SlowSTC(14,3)都Keep住係超買水平，(57238)當然可以落場啦，問題係見住個市Chok到咁，都真係嚇到鼻哥窿都無肉。
都話過唔理你係老散定專家，落場嘅心理質素都係重要同埋要自我「訓練」嘅一環，呢樣嘢早兩日我喺公司等升降機時，見到我老細嘅老細時，佢自己都係咁講。今朝起身開電視見到右下角報日經粒數係負300幾點，心諗：發生咩事？訓個覺啫，搞成咁嘅？然後新聞報道員就話我知：「特朗普宣布下周對入口鋁鋼徵重關稅，市場憂慮爆發貿易戰，拖低三大美股表現…」明晒，(57238)今日應該可以報仇。按嗰兩個入市時段嚟睇，(57238)當時大約做0.035至0.07呢個Range裡面，依家10點7分，(57238)似乎愈升愈有，暫時睇最低做過0.074元，最高見0.091元。就算你一開市就掉走(57238)，都未至於要你輸入肉；假設你依家先施施然去處理隻(57238)，都仲有最少10零格水位比你慢慢食。
返番去睇日線圖，噚日講過恒指日線圖上見三線滙聚，而咁啱粒燭就處於滙聚點(31068至31082附近)嘅下方，唔難想像呢個位嘅阻力有幾強。今日一插，咩技術指標都即刻發出看淡號訊；不過咁，由於噚日失心瘋咁彈咗上去之後今日再插500幾點，係牛熊證街貨圖上其實無嘢落過肚。
噚日恒指最低做過30453點，今日(至10點14分止)最低位就30477點，換言之其實恒指今日跌500幾點，對於恒指牛熊證街貨嚟講，佢都只係用佢嘅低位踏番入去牛證最貼價區30400至30499點裡面。拆細啲用每個範圍50點嘅牛熊證街貨圖度睇，其實恒指只係殺咗30450至30499點嘅牛證(我知以噚日低位計30453點係仲爭3點先叫做完全死亡，3點就豪比佢啦)，呢度有相當於942張期指，再向下數到落30300至30349點呢三個50點嘅範圍的話，其實每個都有成300幾張期指；上方熊證最近都講緊係31050至31099點，即係個滙聚點附近位置，亦即係率先升穿條20天線(30955點)，你要個市今日反彈跳返上去呢個位有無可能？恒指熊(57251)，收回價31200點，高過滙聚點水平，留意番，若然依家先嚟入熊嘅話，你都係做day trade算啦，反正因消息而下跌嘅市過一兩日就會復原；再者今日星期五，過夜嘅話講緊一過就過Weekend，如果Weekend美國徵稅單嘢有咩新進展，你真係無仇報…
祝各位元宵快樂！今日收工返屋企同家人團圓一吓啦！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
