熱門:

2018年2月2日 即巿股評 港股直擊

【盤房來料】大戶食完頭盤等食正餐

日日都玩過山車,唔通日日都要玩過山車咩……無錯,環球股市結束1月最牛行情之後,踏入2月就玩過山車。隔晚美股表現反覆,早段道指跌逾百點,中段曾倒升逾百點,其後升幅收窄,但標指更納指則下跌。至於港股繼續玩過山車,噚日恒指跌咗245點,失守10日線,今早恒指低開73點,跌幅一度擴大至逾300點,低見32321點。其後喺內地股市跌幅收窄,上證指數重上3400點重要關口下,港股亦拗腰倒升,曾升逾百點見32778高位。可惜10日線(32783)又止步,昨日失守後,10日線由支持漸變阻力,中午報收32640點,微跌1點;國指則升64點,報收13498點。

重磅股普遍腳軟,暫時平保(02318)靠穩,半日無起跌,喺20日線總算站住腳。至於港交所(00388)同樣力守20日線(287.4元),半日跌1元,報收289.8元。騰訊(00700)早段曾跌至451元低位,有消息指旗下騰訊信用公測一日即冚旗,皆因有監管機構叫停,不過消息未經證實,而相關公測亦屬限時活動,測試一日停咗再作調較亦唔出奇。已上線超過三年嘅芝麻信用亦未有問題,估計呢個傳聞都係流流地。至於大笨象(00005)繼續喺20日線(84.25)附近上落,話差咩又唔算好差,皆因近幾日都報收陽燭,話好梗又唔係好,20日線未企定,仍有危機落去補埋個上升裂口。

油價近日算強,加上有大行調高油價目標,「三桶油」成為大升反彈主要動力,中石化(00386)升1.9%;中石油(00857)升2.6%;中海油(00883)升3.1%。油服股方面亦見反彈,普遍升幅由2.5%至一成不等。又有內房股抽水,時代地產(01233)集團第二大股東,Fortress Investment 以每股9.25至9.65元,悉數配售所持9000萬股,配售價格較昨日收市折讓5.76%至9.67%,消息令股價低開近一成,半日跌幅收窄至6%。

蘋果派成績表好過市場預期,但預期第二季收入只有600至620億美元,較市場預期低,但未影響蘋概股反彈,不過阿Man早講過今年呢類股份風光不再,即使有反彈亦唔好被引誘去追貨。

大市目前表現反覆,日日高低波幅閒閒地四五百點,有平貨喺手繼續坐定定,盡量唔好以槓杆持貨,否則震多兩震好易被嚇親。至於短炒博反彈更加要留神,有食唔食罪大惡極,尤其踏入2月,全球股市已步入調整,即使港股市底強,可以千點內上落行range代替深度調整,但一千點波幅一旦重倉衍生工具都幾危。不過望望個牛熊證街貨重貨區,呢兩日殺咗32300至32600嗰一批牛證,只不過係頭盤,喺31900點至32200點有一大堆A5和牛,食完頭盤梗係要食埋正餐。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads