熱門:

2018年1月22日 即巿股評 港股直擊

【盤房來料】市底仍強 勿妄想股災

美國有關臨時撥款議案仍未通過,聯邦政府仍然停擺中,但對港股影響有限,反而係本身港股已超買得厲害,上到32000點樓上放慢腳步,高位回吐整固實屬正常。暫時港股未睇到有乜理由要大跌,不過亦要有心理準備調整隨時出現。恒指高開22點,開市後隨即倒跌,早段最多跌208點,見32047點半日低位。其後倒升48點,再創歷史新高32303點。可惜高位乏承接,恒指中午報收32240點;國企指數報13176點,跌2點,跟仍上升嘅上證指數背馳。

恒指權重股四大股王,又係大笨象(00005)最落後,跟住個市跌,不過騰訊(00700)、港交所(00388)跟平保(02318)再創新高。除咗大笨象升唔起,銀行股跟內銀股亦見回吐,不過阿Man唔擔心,始終今年息口趨升,銀行股中線仍睇好。濠賭股繼續上升,一早預咗濠賭股喺今年繼續上力,每次回吐都係吸納好機會。

內房股未受抽水潮影響,整個板塊上升,全靠最近內房股公布嘅銷售數據全部交足功課,不過阿爺開晒口,即使打壓樓市力度唔算大,但係打壓唔會停止,內房股且戰且走,留意隨時再有內房股發功抽水。

汽車股繼續以4S零售商跑贏,和諧汽車(03836)早段曾升14%,半日升幅收窄至6%,公司發盈喜。而永達汽車(03669)同樣發盈喜,股價升逾3%,其他4S汽車股普遍升2%或以上。至於阿Man今年睇好嘅新能源比亞迪(01211),今日發力升至近兩個月高位,半日升逾5%。其他汽車股個別發展,要買阿Man都係揀比亞迪。

港股仲可以行幾遠,暫時無謂去估頂,不過市底強,當然唔好懶醒逆市做淡,留意番32100,守得住個市仍然有機會向上挑戰32400至32500點,相反32100失守,調整或展開,31700係第一個重要支持,失守將向下試30800點。現水平唔建議過份進取,阿Man傾向繼續持貨等,睇住啲支持位,唔失咪手多,支持位失守宜減減磅,待調整再吸。估計調整最快喺結算後出現,尤其結算後開始接近過年,傳統過年前後,內地資金較為緊拙,唔排除未夠貨嘅大戶,隨時出手震倉。阿Man寧願等回調再考慮加碼,一次健康回調有助大市走更遠。雖然燈神堅持股災睇二萬,但阿Man認為恒指四萬不是夢,即使恒指四萬點,計一計條數,市盈率都未夠20倍,仍未到爆煲水平。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads