企咗係金魚缸出面兩日，係就係見住個市日日創歷史新高，這邊廂考慮到恒指日線圖同周線圖都超買得好緊要，在鐘擺理論的「花無百日紅」的基礎認知下，有感港股目前或已見頂；但與此同時恒指每日都創咗個歷史新高出嚟喎，對於要選擇「40000點不是夢」還是「一股不留」，確然係兩難。
當然，你可以話睇牛熊證街貨圖睇下有無破綻嘅，依家10點36分，幫班同事出完淘寶貨計埋運費之後，恒指都仲係見紅，不過跌1跌，做緊32253點。用呢口價計數，上方熊證最貼價嘅係32200至32299點，呢度有18張期指，留意番，今日恒指暫時最高見過32297點，換言之呢個位置嘅期指其實都被食得八八九九，要睇嘅就上多一級嘅32300至32399點，呢度有476張期指，只係屬於第三重貨區；至於最重貨嘅就係32500至32599點，呢度有648張期指，係呀，就憑呢600幾張期指佢成為咗重貨區。
再睇埋下方牛證，最貼價嘅31400至31499點嗰堆牛證有相當於408張期指，同現價比有成853點差距，而重貨區就係31200至31299點，呢度有相當於1228張期指，同現價比嘅話講緊過千點嘅距離。用呢個位放上恒指日線圖嘅話，講緊要落返去10天線(31646點)同20天線(30915點)嘅中間，走勢上，連上年12月7日築到依家嘅「上升通道」都要斷埋。「為嗰個千幾張期指而輸咗個咁靚仔嘅走勢，值得嘛？」講得出呢句說話嘅，你應該係相信「40000點不是夢」嘅粉絲。
Well，唔係話個市無可能見40000點，但當市變得愈來愈難炒但又認為個市係要托住係呢啲高位嘅時候，好自然就會開始搵一啲追落後嘅股份出嚟郁，搵落後股其實都係由一線開始向下搵，一啲呢期成日撞口撞面嘅如騰訊(00700)同平保(02318)就可以慳返唔駛睇，內銀、國壽(02628)、港交所(00388)同埋啲證券股上個星期先炒完，可以慳返；至於本地地產股方面，相信要「小陽春」殺到嚟先有睇頭，更何況走勢上都唔係好落後啫，濠賭股發力中，資源股回緊氣，諗嚟諗去，都係得返車股，當中比較靚仔嘅係吉利(00175)
「吉利個日線圖衰到無朋友喎」，啱囉，我就係要搵樣衰嘅等佢變Oppa嘛，所以你見呢三日都穿過條100天線(25蚊)，而日線圖嘅走勢上見到條「下降通道」有跌定橫行嘅跡象，呢兩日又剛好落到落保歷加通道底且保歷加通道其見打橫，未見拓闊，而日線圖上嘅技術分析SlowSTC(14,3)嘅%K線同%D線分別得8.659同12.96，係爭條14RSI見39.16嫌佢未夠低，吉利Call(29277)，行使價25.3元，2%價外，街貨有逾30%係多咗啲，不過勝在高槓桿、低引伸喎，試吼5分鐘圖見超賣小注入落場。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
