港股上周五被掟578點後，踏入五窮月首個交易日唔多吉利，全日再插367，埋單兩日唔見近千點，好彩美期暫見喘穩，道期反彈0.5%，納期則奀彈0.18%。
拆開港股血案原因，主要是美滙突然振夫綱，一大棍急升兼踢穿下降軌(圖一)，美滙突轉強，因上周五晚美國公布核心PCE按年升1.8%，呢粒數是聯儲局衡量通脹重要指標，過往聯儲局以2%為分界，升穿咗就會啟動加息。
核心PCE逼近聯儲局加息底線？
由於核心PCE逼近2%，加埋市場上周不斷報道銅價企在超過十年高位，銅博士升喎，條件反射梗喺炒通脹啦！
市場熱炒通脹預期，更睇死十年債息升穿兩厘，聯儲局揸Fit人鮑威爾，多次強調唔駛驚通脹，連財長耶倫也加入護航，認為拜登推出的經濟振興方案，不太可能會造成通脹壓力，但睇來暫時都壓唔住市場預期。
市場有市場預期，但筆者深信市場根本喺炒錯邊，就以布蘭特油價計，去年最低見過15.98美元，以現價66.25美元計，按年計大升3.1倍，油作為通脹睇得好重的項目，通脹唔大升才奇怪。
無可否認經濟持續復甦，但疫情未過去，需求端喺咪咁旺已好有疑問，更何況國與國港口以至運輸業受疫情影響，物流受阻挾高價格絶對大有可能。
商品價格難大升
另一方面，美國以印錢撐起整個經濟，M2也持續大幅攀升，以過往的理論，印錢印得多，通脹勢必爆升。
問題喺美國經濟增長失速，M2增加同時，GDP卻增長落後M2升幅，若以M2 Velocity計(即美國GDP除M2)(圖二，下)，聯儲局狂印，M2 Velocity反而跌得更急，即意味印出來的錢被大幅吸收，也暗示通縮壓力遠比通脹大。
如果再細看各類商品價格，過去半年內，除了金價(圖三)創過紀錄新高外，銅價(圖四)也只是貼近歷史高位，相反布蘭特油價現水平，與歷史高位147.5元的亦差一大截(圖五)。
其他金屬價格如銀(圖六)、鎳(圖七)和鋅(圖八)，其價格走勢與油價差唔多，只得鋁價叫做好D(圖九)。至於農產品棉現水平也離高位甚遠(圖十)。
此外，新聞經常提的航運價格高企，若果拉長波羅的海乾散貨指數(圖十一)，其實只喺得啖笑，相對過萬點最高峰期，現只喺於當時嘅四分之一。
通縮威脅似黑洞
聯儲局狂印，從M2 Velocity角度，好明顯谷唔起通脹，而過去十年美國核心PCE升穿兩厘，好快又跌到加息門檻水平樓下，美國各官員其實心知肚明，所以通脹根本唔成威脅。
不過，市場的羊群只睇標題，看到PCE升得勁，再睇埋銅價企在高位，一句到未睇死通脹升温，但去到呢個位，印度疫情大爆發，全球經濟復甦之路未必再走到好遠，為避免進一步走入通縮，央行大力收水根本難、難、難。
在通縮威脅似黑洞下，央行只能印水頂住現時微弱的經濟增長，在債息未必可再大幅上揚下，科技股即將可重生，而每次科技股急跌，都是增持嘅時機，緊記Don't Fight the Fed！
作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周一、三在「信報網站」及「港股360」撰文。
（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）
歡迎訂購實體書 電子書：https://bit.ly/ejbook141
