熱門:

2021年3月29日 國際財經 即巿股評

【環宇搜股】老虎之亂小事一樁

周五晚美股多隻中概股突然上演高台跳水,包括即將本港第二上市的騰訊音樂(TME)、跟誰學(GSX)及愛奇藝(IQ),還有只在香港上市未足月嘅百度(09888)。

百度大跌似比亞迪2014年急瀉翻版

直覺上,上述情況相當奇怪,若果是擔心中概股被除牌或阿爺郁手整治平台股,大道理連最大美國中概股阿里巴巴(09988)以至拼多多(PDD)都應該大冧,但結果只是個別中概股區域核爆,事件即令筆者記起2014年比亞迪12月18日暴跌事件。

當日比亞迪1218事件背景喺突然中午過後,比亞迪AH股股價突然大冧,A股跌停之外,H股更無厘頭暴瀉46.9%(圖一),最低見18.7元(之前一日收市為35.2元),變相大特賣,最終收市插28.8%,收25.05元。

翌日(2014年12月19日)比亞迪股價戲劇性進一步回升,H股一度大升22.2%,高見30.6元,收市則升28.6元,漲14.2%,A股則再跌7.1%,收34.81元人民幣,之後股價完全無事。截至今日,比亞迪離奇大跌事件依然喺個謎,市傳有基金被斬倉,但無法證實。

百度平到無朋友

講番上周五中概股離奇大跌事件,筆者認為應該要入市,買嘅對象喺百度,原因喺當百度跌到200美元,預期市盈率只得19.2倍,跌到去190美元、180美元及當日低位174.05美元,預期市盈率更降至18.3倍、17.3倍和16.7倍,簡直喺平到無朋友。

雖然百度唔入流,甚麼ATMXJ完全見唔到百度身影,但唔好唔記得,百度「衰衰地」都喺當年科網三大龍頭BAT一員,若果對比騰訊(00700)、阿里巴巴、京東(09618)、美團(03690)及小米(01810),預期市盈率分別為31.99倍、21.7倍、30倍、690倍及30.6倍,百度掟到190美元附近,以自動駕駛內地一哥來計,絶對吸引。

況且,呢種無厘頭暴瀉事件,與當日比亞迪事件九成相似,風暴過後便會回升,故此若果近日再見到呢D情況,不仿細注買入,以上周五低位174.05美元止蝕(圖二)。至於本欄假倉,在上周五也有參與,均價為184.14美元。

至於中概股暴跌事件,周日終於知喺乜事,原來一間韓資基金老虎基金前交易員Bill Hwang家族辦公室Archegos遭斬倉所致,Archegos事件更引發野村及瑞信首季錄巨額虧損,單喺野村全日大跌16.3%,瑞信執筆時也勁跌一成四。

央行坐大廳無咩需要驚

野村瑞信冧棚,會唔會燒埋其他投行引發金融危機?筆者好有信心答絶對唔會,只喺睇美滙及日圓無大拆倉(即美滙及日圓急升,圖三),即喺市場根本就唔驚。

點解市場唔驚會引發火燒連環船,原因喺又喺「央行坐大廳,點解要咁驚」,萬一銀行出事,聯儲局、歐洲央行以至日本央行最終咪又喺死死地氣,印錢埋單填咗個大窿,所以老虎之亂根本就唔驚。

覆讀者新經濟股

最後覆讀者LING TSANG提問,對於科技股前景,我認為故仔未變,尤其市場驚通脹上升,引發長債走高,無可否認短期會面對通脹大幅攀升風險,原因喺上年同期基數超低所致。

不過,我信女股神果套,即喺通縮風險大過通脹,特別喺科技達到神級水平,變相令效率大幅提升,同時新能源成本越來越平,油價升到兩百美元是天方夜譚,加上亞洲區製遠產品高效率輸出全世界,人口減少即產品過多,最終價格被壓低,同時大型科網企業補貼(拼多多是一個好例子),最終會令通縮風險大過通脹。

科技龍頭股絶對是值得逢低吸納長揸,現時閣下仍有兩成利潤在手,只要股價未有跌穿3月低位,揸住絶對無問題。

作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周一、三在「信報網站」及「港股360」撰文。

(編者按:信報分析團隊羅崇博、尹德政、陳鎮強最新著作《勢在必行:活用全方位價值趨勢信號》現已發售)

歡迎訂購實體書 電子書:https://bit.ly/ejbook141

[email protected]

放大圖片

放大圖片

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads