即巿股評 | 2021-12-07 10:45

【輪證贏家】京東再殘啲就博技術反彈

噚日準備咗隻恒指Put(26028)，諗住吼恒指五分鐘圖見Slow STC(14,3)出到超買就落場，等咁一個朝早都唔見Slow STC(14,3)上到超買，下半場唯有改變策略，進取啲嘅可以吼指數唔過五分鐘圖上嘅保歷加通道中軸而闖入。不過，兩種方法都未能入到隻(26028)，事關噚日全日恒指五分鐘圖條Slow STC(14,3)最叻都係上到70幾；而喺1點50分打後，指數係上破咗保歷加通道中軸。雖然恒指之後喺大約2點25分再次失守返條保歷加通道中軸後再見下行且 創當日低位，不過搵唔到啱嘅入市位，佢點跌都無用。

依家9點15分，恒指仲行緊U盤，先睇牛熊證街貨圖，見到噚日最想指數殺落嗰四層過千張期指今日都仲健在，同時先到由22900至22999點打後嘅牛證街貨層開始，都有新嘅街貨流入，反映到市場對23000點呢個關口位都幾有信心。至於熊證方面，最貼價落到23600至23699點，終於都有返啲再貼價啲嘅熊證街貨層出現。

恒指終於都完U，開市升逾300點，又係嘅，噚晚美股升成600幾點完場，大陸仲要出埋降準，依家指數擺位又再次近返熊證街貨層，第一層23600至23699點嘅熊證仲要死晒，變相23700至23799點嘅熊證成為最貼價熊。再望上啲見23800至23899點有688張期指，為最多新增街貨層，亦都係近熊之中最多貨嘅一層。

依家9點38分，恒指正式開市後暫呈高開低走，然而，喺日線圖上見指數今日彈升但連10天線都仲未掂，同步見Slow STC(14,3)兩線仍然呈下，唔通之前畫嘅「長方形」仍然生效？噚日只係一個「假跌」現象？

未能斷定指數方向，又試下向個股出發，今日恒指雖然開局造好，不過都仲有唔少股份逆市下行，就好似隻京東(09618)咁，今日連300蚊都失埋，日線圖上見股價回落到保歷加通道底線，而Slow STC(14,3)兩線都開始進入超賣範圍，更重要嘅係，由大約8月中至今嘅「上升軌」都已經失埋，呢啲價殘股最值得吼嘅就係出博出技術反彈，只係依家連少少訊號都未見到，可以Bookmark住先。

嚟到9點51分，恒指暫時似乎跌停咗一陣，喺五分鐘圖上見指數於23600點似乎暫時有短暫支持，而且仲彷彿見到指數想行個「圓底」出嚟添，咁嘅情況都係唯有等住指數行完再算。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar