熱門:

2023年6月6日 港股直擊 即巿股評

【盤房來料】恒指20天線未企穩 慎防反彈完結

美股隔晚先升後回,因為業績期過去,AI概念又炒咗一段時間,美債上限都通過埋,連蘋果發布新產品都炒完,暫時市場焦點又放返喺嚟緊嘅議息會議度。至於港股兩日彈咗近千點後,今早一度重上20天線(19276點),再升逾200點,但半日表現較反覆,20天線未能企穩,升幅收窄至百點之內。

恒指高開8點,早段一度跌64點,見19043半日低位,其後止跌回升,更突破20天線,最多升268點,見19377。不過半日升幅削半,未能企穩20天線。恒指半日收19206,升98點;國指升57點,報6521;報恒科指升24點,收3865。半日成交額553.46億元,依然無乜起色。

藍籌股個別發展,港交所(00388)升0.9%,友邦(01299)升0.8%,工行(01398)升0.5%,建行(00939)靠穩,平保(02318)升1.5%,不過大笨象(00005)半日跌0.7%,金融股升幅好似放緩,似乎呢啲位大家都唔多想再追貨。至於科網股表現好壞參半,騰訊(00700)半日倒跌1%,但美團(03690)、京東(09618)跟阿里(09988)仍撐住,半日分別錄得1.2%、2.5%及0.3%升幅。不過金山雲(03896)半日股價跌6%,原因係競爭對手阿里旗下嘅阿里雲,再降產品價格。

科網股開始見疲態,蘋果概念股表現更差,蘋果喺WWDC發布首款MR頭戴式裝置設備Apple Vision Pro,似乎市場唔多buy,有「最強蘋果分析師」稱號的天風國際分析師郭明錤認為,考慮售價與發售日等因素,將不利短期投資情緒,蘋果股價隔晚創高位後回吐,相關概念股今日捱沽。高偉電子(01415)半日急跌16.1%,舜宇(02382)跟瑞聲(02018)分別跌1.2%及2.2%,比亞迪電子(00285)則跌1.8%。

美滙指數升抵105大阻力位前回吐,人民幣反彈,內房跟物管股跟住人仔彈,雖然碧桂園(02007)5月合同銷售按年跌36.6%,但股價仍彈6.2%;合景泰富(01813)仲誇張,5月預售額按年跌42%,股價卻急升17.1%,都算係鐘擺效應,之前跌得愈甘,短線反彈愈急。融創(01918)半日亦彈12.8%;龍湖(00960)半日升一成,成為表現最佳藍籌股;其他內房股普遍錄得3%以上升幅。至於物管股亦跟住內房股嘅節奏反彈,升幅由近2%至超過半成不等。不過阿Man都係繼續睇死內房股,有波幅,冇升幅。

港股經過連日反彈,今日挑戰20天線,但若未能企穩,短線或回吐搵支持,暫時叫做重上萬九關,萬九會係首個支持位,穿萬九下一個支持位將會係10天線(18818點),一旦10天線再失守,本輪反彈應玩完,咁就再向下尋底,萬八呢個大支持位再穿,阿Man都無眼睇。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads