美國債務上限法案通過，而上周五公布非農數據表現強勁，美股上周五急升，帶動港股夜期跟ADR繼續做好。不過港股上周五急升後，今日續升，但表現較為反覆，目前恒指仍企穩於萬九關之上，期指則於萬九關爭持。
恒指高開65點，一度倒跌53點，見18896半日低點，之後內地公布5月財新中國服務業PMI升至57.1，好過市場預期，大市止跌回升，半日最多升140點，見19090半日高位。半日恒指報收19052，升102點；國指升14點，報收6442；恒科指半日升4點，報收3829。半日成交額541.2億元。
藍籌股以金融股表現最好，大笨象(00005)跟友邦(01299)半日齊齊升1.8%；內銀股亦有唔錯表現，內險股表現平平。科網股個別發展，ATMJ表現好壞參半，騰訊(00700)跟阿里(09988)半日齊升0.3%；但京東(09618)跟美團(03960)分別跌0.8%及0.3%。百度(09888)跟網易(09999)半日跌1%。
美滙指數再轉強，人民幣回軟，上周急升嘅內房跟物管股回復弱勢，普遍下跌，跌幅閒閒地超過2%。除咗內房物管股回軟，美匯指數回勇，金價略為回落，金礦股亦下跌，藍籌新貴紫金礦業(02899)半日跌2.6%，招金(01818)更急跌8.6%。資源價疲軟，中國宏橋(01378)半日跌4.7%，係表現最差藍籌股。同樣係藍籌新貴，攜程(09961)半日升4.5%，為表現最好藍籌。
經過上周五急升，今早期指高開低走，一旦現貨亦未能企穩19000大關，有機會呢一輪反彈已完結，港股目前仍處於下降軌之內，雖然上周成功收復10日線(18800)再度失守，重返萬八再下破機會甚高。港股始終未能解決成交不足問題，一個無成交配合嘅反彈，顯得港股更為虛弱。
麥狄文
(徐狄怡‧證監會持牌人)
