資源價格回落，美國通脹預期降溫，加上聯儲局官員跟部份大行表示美國經濟並不會陷入衰退，美股上周五三大指數急升，標指跟納指升逾3%。與此同時，內地5月工業企業利潤跌幅收窄，加上憧憬七一回歸，又到半年結，粉飾櫥窗效應下，港股今早急升逾3%，恒指半日升近700點。
恒指高開257點後，見21976已經係半日低位，100日線(21703)輕易收復，開市後升幅持續擴大，升勢有餘未盡，至中午升695點，見22414半日高位，更創4月4日以嚟高位。恒指中午報收22403，升684點；國指升257點，報7886；恒科指更升逾半成，升278點，報收5122，創近四個月高位，更重返5000水平。半日成交額增至1027.77億元，好耐無見半日有過千億成交額，今日呢個成交總算配合到升幅。
藍籌股幾乎全線上升，只有三隻股份逆市下跌，包括恒生(00011)跟東方海外(00316)半日分別跌0.4%及0.6%；信義光能(00968)發盈警，半日跌2.5%，成為表現最差藍籌股。港交所(00388)裂口上升，半日升6.2%，成交額亦急升，喺成交榜高居第三位。其他重磅股普遍向上，雖然澳門疫情雖升溫，但澳門政府正努力防控，而賭場仍未有暫停營業，金沙中國(01928)半日升8.2%。
科技股升勢凌厲，小米(01810)喺整個升浪之中表現最落後，今日發力追落後，半日急升12.8%，連小米都急升，跟住個市仲有乜嘢可以支撐指數更上一層樓，阿Man都諗唔到。騰訊(00700)一度重上400，呢個阻力位唔係咁易企得住，加上主要股東南非Nasper將有序地減持騰訊股份套現，騰訊可能嚟到呢度要行人止步。至於美團(03690)、阿里(09988)跟京東(09618)亦已升抵阻力位附近，美團阻力喺210-215，阿里阻力喺120-125，京東阻力位係270-280左右。有貨嘅就睇住呢啲阻力位，趁反彈減持一下，套現準備回吐時再撈貨。
汽車股繼續有政策扶持，北京出台現金補貼以刺激新能源汽車需求，汽車股繼續有追捧，吉利汽車(00175)半日升4.2%，其他汽車股普遍升2%以上。內需股今日亦見資金追捧，內地疫情受控，上海本周三起有序開放餐，相關飲食股向上，升幅閒閒地超過半成，其他內需股以一對體品孖寶表現最好，李寧(02331)跟安踏(02020)半日齊齊升近一成。
港股喺本周長周末假期前，半日急升，雖然成交有所增加，但恒指22500阻力實在唔細，加上半年結粉飾櫥窗效應下，期結及半年結完成後，大市能否仍守住高位成問題，既然21000都無信心買貨，更何況上到22000，值博率更低。
麥狄文
(徐狄怡‧證監會持牌人)
