隔晚美股先高後低，納指更倒跌收場，並且插穿3月收市低位，表現弱過藥煲，加上人民幣離岸價今早再創近半年低位，以為港股今日都難有作為，偏偏喺期指結算日就反覆向好，恒指重上二萬大關，更一度升逾300點；恒科指則重越4000大關。不過喺北水休戰下，半日成交只有567.1億元，咁嘅成交額升市都唔講得上係轉勢。只係結算加埋月結，大戶稍為托高些少個指數，同埋咁啱得咁橋，近排北水放假都例牌挾高啲，口痕友話係少咗北水沽貨阻頭阻勢，要挾高指數話咁易。
恒指高開172點，升幅一度縮水淨返10點，不過內地股市止跌回升，港股乘機挾返上20000點結算。半日恒指最多升340點，見20286半日高位，不過人民幣再走軟，港股升幅亦收窄。半日恒指報20190，升243點；國指半日收6874，升88點；恒科指半日升26點，報4007點，不過4000點呢個位都唔係咁易守，重磅嗰幾隻科網股稍稍腳軟，呢個關口必定得而復失。
藍籌股竟然爆大冷，一向最弱嘅阿里(09988)半日升3.7%，成為表現最好恒科指成份股，不過恒指成份股表現最好未輪到佢，招行(03968)半日反彈5.7%，係表現最好藍籌股，不過呢一下都只係技術反彈，暫時50元阻力大到咩咁，呢啲反彈唔博就罷就。美團(03690)早兩日強勢，但今日明顯放軟咗手腳，加上150至160元阻力大，150元企唔穩嘅話，呢一輪反彈可能又告一段落。
至於騰訊(00700)呢兩日明顯落後過美團跟京東(09618)，京東半日仲有2%以上升幅已算唔錯，但230元阻力都幾明顯。連跌幾日嘅大笨象(00005)反彈1.2%，仲喺低位徘徊，要上返50元似乎有啲難度。比亞迪(01211)交出一份極度靚仔嘅季度業績，喺供應鏈緊張兼疫情反覆下，首季盈利仍增長2.41倍，但股價半日僅升1.3%，相信支持者會有啲失望。留意比亞迪能否守住220元，守得住又唔算太差。
雖然金價回落，但其他資源股有資金流入，煤炭股跟鋼鐵股有追捧。雖然發改委開到口話要全面監測煤炭生產，唔容許價格超出合理區間，又要確保能源供應安全性。只係煤炭價格上升係環球性問題，以本港嘅煤炭股相對其他市場煤炭股估值仍偏低，應該仲有一定上升空間。至於鐡鐵股，當然係因為阿爺大力支持大搞基建而向上炒，只係金價若然已見頂，鋼鐵股都只會炒上落。兩個板塊要二選一嘅話，阿Man會揀煤炭股。
麥狄文
(徐狄怡‧證監會持牌人)
